“एकनाथ शिंदे यांची शेती पंचतारांकित !! अमावस्या,पौर्णिमेला…” उद्धव ठाकरेंची टोलेबाजी

मुंबई-पोलीस नायक (वृत्तसेवा) :-

दि.२७ जून २४ गुरुवार

संपूर्ण सरकारला जनता बाय बाय सरकार म्हणते आहे व या सरकारच्या निरोपाच्या अधिवेशनात काही घोषणा होण्याची शक्यता आहे.उद्याच काही घोषणा होऊ शकतात.केंद्रात आणि प्रत्येक राज्यात अर्थसंकल्प मांडला जातो त्या अनुषंगाने ज्या योजना किंवा घोषणा असतात त्याची आर्थित तरतूद केली जाते.उद्या घोषणांचा पाऊस असेल पण तो गाजर संकल्प असणार आहे अशी बोचरी टीका उद्धव ठाकरेंनी केली आहे. घोषणा आजवर खूप झाल्या.घोषणांचा पाऊस आणि अंमलबजावणीचा दुष्काळ हे कायमच झाले आहे.दोन वर्षांत ज्या घोषणा केल्या त्याची पूर्तता किती झाली हे खरेपणाने सांगावे असे उद्धव ठाकरेंनी म्हटले आहे तसेच मुख्यमंत्री एकनाथ शिंदे हे पंचताराकिंत शेती करतात म्हणत त्यांना टोला लगावला आहे.या सरकारला खोके सरकार,महायुती सरकार म्हणतात पण केंद्र आणि राज्याचे डबल इंजिन सरकार म्हणजे महागळती सरकार आहे.हे लिकेज सरकार आहे कारण राम मंदिराच्या गाभाऱ्यात गळती झाली आहे.पेपरही फुटत आहेत.आम्ही प्रश्न मांडले की आमच्यावर आरोप होत आहेत.आमच्याकडून काही प्रश्न उपस्थित केले जातीलच मात्र आत्ताची जी परिस्थिती आहे ती आपल्याच माध्यमांतून आम्हाला समजते आहे.राज्यातले शेतकरी ही परिस्थिती भोगत आहेत.सरासरी रोज एक शेतकरी फक्त अमरावती जिल्ह्यात आत्महत्या करतो आहे.घटनाबाह्य मुख्यमंत्र्यांनी जाहीर केले होते की एकही शेतकरी आत्महत्या करणार नाही.घटनाबाह्य मुख्यमंत्र्यांनी शपथ घेतली तेव्हाच हे जाहीर केले होते पण शेतकरी आत्महत्या करत आहेत.घटनाबाह्य मुख्यमंत्र्यांचे ठीक आहे कारण त्यांची शेती पंचतारांकित आहे.हेलिकॉप्टरने जाणारे ते एकमेव शेतकरी आहेत.अमावस्या,पौर्णिमेला वेगळे पिक मुख्यमंत्री काढतात असेही कळले आहे असा टोला उद्धव ठाकरेंनी लगावला आहे.