जालना-पोलीस नायक (वृत्तसेवा) :-
दि.२९ जून २४ शनिवार
मुंबई-नागपूर समृद्धी महामार्गावर दोन कारमध्ये झालेल्या भीषण अपघातात सात जणांचा जागीच मृत्यू झाला तर चार जण गंभीर जखमी झाले आहे.सदरील जखमींना तातडीने प्रथम जालन्याच्या जिल्हा रुग्णालयात प्राथमिक उपचार करून पुढे छत्रपती संभाजीनगरला हलवण्यात आले असून सातही मृतदेह उत्तरीय तपासणीसाठी जालना जिल्हा रुग्णालयात आणण्यात आले आहेत.सदर दुर्घटना ही जालन्याजवळील कडवंची गावानजीकच्या चॅनल क्रमांक ३५१ वर मध्यरात्री घडली असून मृतांची पूर्ण नावे पटवण्याचे काम सुरू आहे .
स्विफ्ट डिझायर कार (क्र.एमएच.१२.एमएफ.१८५६) डिझेल भरल्यानंतर निघाली होती तर ईरटीका कार (क्र.एमएच.४७.बीपी.५४७८) ही नागपूरहून मुंबईकडे निघाली होती.सदरील अपघाताची माहिती मिळताच समृद्धी महामार्ग पोलीस आणि तालुका जालना पोलिसांनी घटनास्थळी धाव घेत क्रेनच्या साह्याने बचाव कार्य करत दोन्ही कार समृद्धी महामार्गाच्या बाजूला घेऊन रस्ता वाहतुकीसाठी खुला केला.दोन्ही कारमधील १०-१२ प्रवासी जखमी झाले असून त्यापैकी ४ प्रवाशांना जिल्हा सामान्य रुग्णालयात उपचारासाठी दाखल करण्यात आले होते. त्यातील ३ रुग्णांची प्रकृती चिंताजनक असल्याने त्यांना छत्रपती संभाजीनगर येथील जिल्हा सामान्य रुग्णालयात पाठविण्यात आले आहे तर एकावर जालना जिल्हा सामान्य रुग्णालयात उपचार सुरू आहेत.घटनेतील मृतदेह रुग्णालयात उत्तरीय तपासणीसाठी दाखल करण्यात आले आहे अशी माहिती जिल्हा सामान्य रुग्णालयातील वैद्यकीय डॉ.उमेश जाधव यांनी दिली आहे.
