पुण्यात टोमॅटोने भरलेल्या ट्रॅक्टरचा भीषण अपघात, 3 महिला ठार तर ६ महिला गंभीर जखमी

पुणे-पोलीस नायक(प्रतिनिधी):- पुण्यातील खडकवासला धरण कालव्याच्या बत्तीस फाट्यामध्ये ट्रॅक्टर पलटी होऊन झालेल्या भीषण अपघातात तीन महिला ठार तर सहा महिला गंभीर जखमी झाल्या आहेत.सदरील अपघात दि.१३ रोजी सायंकाळी ५ वाजेच्या सुमाराला घडली.जखमींना दौंड व भिगवण येथील दवाखान्यात उपचारासाठी दाखल करण्यात आले आहे.

याबाबत मिळालेली माहिती अशी कि,दि.१३ रोजी सायंकाळी पाच वाजताच्या सुमारास टोमॅटोने भरलेला ट्रॅक्टर शेतातून बाहेर काढत असताना खडकवासला धरण कालव्याच्या बत्तीस फाट्यामध्ये ट्रॅक्टर चालकाचे नियंत्रण सुटले आणि हा अपघात झाला.ट्रॅक्टर पलटी झाल्याने ट्रॉलीत बसून निघालेल्या महिला या ट्रॉलीखाली सापडल्या व त्यात त्या गंभीर जखमी झाल्या आहेत.टोमॅटो घेऊन हा ट्रॅक्टर ट्रॉलीसह शेतातून बाहेर पडताना खडकवासला कालव्याच्या ३२ व्या क्रमांकाच्या वितरीकेवरून निघाला होता यावेळी चालकाचे ट्रॅक्टरवरील नियंत्रण सुटून हा अपघात घडला.यामध्ये रावणगाव परिसरातील बंगाल वस्तीवरील नऊ महिला होत्या.उपचारादरम्यान यापैकी तीन महिलांचा मृत्यू झाला तर बाकी महिला गंभीर जखमी आहेत.सुरेखा बाळू पानसरे,रेश्मा भाऊसाहेब पानसरे,अश्विनी प्रमोद आटोळे असे या अपघातात मृत पावलेल्या महिलांची नावे आहेत.तर इंदुबाई बाबासाहेब आटोळे,मीना बापू आटोळे,अनिता धनाजी साळुंखे,आक्का सुदाम साके,कावेरी माणिक आटोळे, उषा राजेंद्र आटोळे या  सहा महिला अपघातात गंभीर जखमी झाल्या आहेत.या सर्व महिला एकाच वस्तीवरील असल्याने या परिसरात हळहळ व्यक्त केली जात आहे.