“५० हजार खर्चून निवडणुकीतील मतदान आपल्याकडे वळवा” !! प्रकाश आंबेडकरांचा अधिकाऱ्यांना सल्ला

मुंबई-पोलीस नायक (वृत्तसेवा) :-

दि.२१ ऑक्टोबर २४ सोमवार 

सर्वोच्च न्यायालयाने दोन महिन्यांपूर्वी अनुसूचित जाती आणि अनुसूचित जमातींच्या आरक्षणात काही जातींना वेगळे आरक्षण देण्यासाठी वर्गीकरण करता येईल असा निकाल दिला व या निकालाच्या विरोधात देशभरातल्या अनुसूचित जाती आणि अनुसूचित जमातीच्या संघटनांनी एकत्र येत २१ ऑगस्ट रोजी ‘भारत बंद’चे आंदोलन पुकारले होते.अनुसूचित जाती आणि जमातीच्या आरक्षणाला संविधानाच्या नवव्या परिशिष्टात टाकावे जेणेकरून भविष्यात पुन्हा कधीही त्याला न्यायालयात आव्हान देता येणार नाही अशी मागणीही त्या भारत बंद आंदोलनाद्वारे करण्यात आली होती.अनुसूचित जाती व अनुसूचित जमातींच्या आरक्षणाचे उपवर्गीकरण आणि क्रिमी लेअरचा निर्णय लागू करण्याच्या दृष्टीने पावले टाकण्यास सुरुवात केली आहे.दरम्यान वंचित बहुजन आघाडीचे प्रमुख प्रकाश आंबेडकर यांनी देखील केंद्र सरकारच्या धोरणास विरोध दर्शवला आहे.आंबेडकर यांनी काही वेळापूर्वी एक्स या मायक्रोब्लॉगिंग प्लॅटफॉर्मवर एक पोस्ट केली आहे.या पोस्टमध्ये त्यांनी म्हटले आहे की केंद्राच्या या धोरणाला आपण निवडणुकीतून विरोध केला पाहिजे व याला आपण निवडणुकीचा मुद्दा बनवले पाहिजे तसेच आंबेडकरांनी सर्व सनदी व शासकीय अधिकाऱ्यांना याविरोधात एकत्र येण्याचे व निवडणुकीतील मतदान आपल्याकडे वळवण्यासाठी काम करण्याचे आवाहन केले आहे.प्रकाश आंबेडकरांनी अधिकाऱ्यांना सल्ला दिला आहे की त्यांनी स्वतःचे ५० हजार रुपये खर्च करा आणि मतदान आपल्या बाजूला वळवा.