“पंतप्रधान देशाचे असतात पण मोदी मात्र सर्व चांगले प्रकल्प आपल्याच गृहराज्यात पळवून नेतात” !! खरगेंचे जोरदार टीकास्त्र

नागपूर-पोलीस नायक (वृत्तसेवा) :-

दि.१० नोव्हेंबर २४ रविवार

पंतप्रधान देशाचे असतात.विविध राज्यांना औद्योगिक प्रकल्प,विकास प्रकल्प देण्याचे काम पंतप्रधानांचे असते परंतु मोदी मात्र सर्व चांगले प्रकल्प आपल्याच गृहराज्यात पळवून नेतात अशी टीका काँग्रेसचे अध्यक्ष मल्लिकार्जुन खरगे यांनी केली ते काल शनिवारी नागपुरात पत्रकार परिषदेत बोलत होते.खरगे म्हणाले,मोदी आधी काँग्रेसकडून ७० वर्षांचा हिशेब मागत होते आता ५५ वर्षांचा हिशेब मागत आहेत.आम्ही तर हिशेब देतोच पण मोदी साडेतेरा वर्षे गुजरातचे मुख्यमंत्री आणि ११ वर्षांपासून पंतप्रधान आहेत त्यांनी सुमारे २५ वर्षांचा हिशेब जनतेसमोर ठेवला पाहिजे.गुजरातचे मुख्यमंत्री म्हणून योग्य पद्धतीने काम केले असते तर आज त्यांना इतर राज्यांचे प्रकल्प गुजरातमध्ये पळवण्याचे उद्योग करावे लागले नसते.नागपूर शहरात दोन मोठे नेते आहेत पण त्यांचा प्रभाव मोदींसमोर टीकत नाही.नागपूरला येऊ घातलेले प्रकल्प गुजरातला पळवण्यात येत आहेत पण हे दोन्ही नेते गप्प बसले आहेत त्यांना आपली खुर्ची टिकावयची आहे त्यामुळेच तर नागपुरात प्रस्तावित एअरबसचा विमान निर्मिती प्रकल्प गुजरातला नेण्यात आला.