नाना पटोलेंनी राजीनामा दिला ? !! विधानसभा निवडणूक निकालांच्या पार्श्वभूमीवर चर्चा !!

मुंबई-पोलीस नायक (वृत्तसेवा) :-

दि.२५ नोव्हेंबर २४ सोमवार

लोकसभा निवडणुकीत महाराष्ट्रात काँग्रेस सर्वात मोठा पक्ष ठरला होता व काँग्रेसने राज्यात १३ जागांवर विजय मिळवला होता त्यामुळे महाराष्ट्र विधानसभा निवडणुकीत काँग्रेसकडून चांगल्या कामगिरीचा अंदाज वर्तवला जात होता.त्याच आधारावर जागावाटपातही काँग्रेसला जास्त जागा देण्यात आल्या होत्या पण निकालात मात्र काँग्रेसची मोठी पीछेहाट झाल्याचे दिसून आले आहे.संपूर्ण महाविकास आघाडी अवघ्या ४९ जागांवर मर्यादित राहिली व या पराभवाची जबाबदारी स्वीकारत काँग्रेस प्रदेशाध्यक्ष नाना पटोलेंनी राजीनामा दिल्याची जोरदार चर्चा पाहायला मिळत आहे.यासंदर्भात काँग्रेस पक्षाकडून उत्तर देण्यात आले आहे.विधानसभा निवडणुकीत भारतीय जनता पक्षाने स्वबळावर १३२ जागा जिंकून आणल्या आहेत.त्याव्यतिरिक्त शिवसेना (शिंदे गट) पक्षाला ५७ ठिकाणी विजय मिळाला आहे.राष्ट्रवादी काँग्रेस (अजित पवार) गटाने ४१ ठिकाणी विजय मिळवला आहे.महायुतीतील सर्व घटकपक्षांच्या मिळून राज्यात तब्बल २३५ जागा निवडून आल्या आहेत त्याउलट महाविकास आघाडीला फक्त ४९ जागांवर समाधान मानावे लागले असून त्यात शिवसेना(उद्धव ठाकरे) पक्षाला २०,राष्ट्रवादी काँग्रेस (शरद पवार) पक्षाला १० तर काँग्रेसला अवघ्या १६ जागांवर विजय मिळाला आहे.