विधानसभेतील पराभवानंतर ठाकरे गट मोठा निर्णय घेणार ? !! अंबादास दानवेंचे सूचक विधान !!

मुंबई-पोलीस नायक (वृत्तसेवा) :-

दि.२७ नोव्हेंबर २४ बुधवार

महायुतीला विधानसभेच्या निवडणुकीत मोठे बहुमत मिळाले तर महाविकास आघाडीला मोठा धक्का बसला.या निवडणुकीत महायुतीला मिळालेल्या यशानंतर राज्यात महायुतीचे सरकार लवकरच स्थापन होईल.सरकार स्थापन करण्यासाठी महायुतीच्या नेत्यांमध्ये हालचाली सुरु आहेत तसेच लवकरच सरकार स्थापन होईल असे  महायुतीच्या नेत्यांकडून सांगण्यात येत आहे.मात्र दुसरीकडे महाविकास आघाडीला अपयश आल्यामुळे आता महाविकास आघाडीतील पक्षांकडून मंथन बैठका घेण्यात येत आहेत.या पार्श्वभूमीवरच शिवसेना ठाकरे गटाकडून विजयी आमदारांची आणि पराभूत झालेल्या उमेदवारांसह पदाधिकाऱ्यांची बैठक पार पडली आहे.या बैठकीत पदाधिकाऱ्यांनी काही वेगवेगळ्या भूमिका मांडल्या.यासंदर्भात ठाकरे गटाचे नेते अंबादास दानवे यांनी बैठकीत काय चर्चा झाली ? यासंदर्भातील माहिती सांगत काही सूचक भाष्य केले.बैठकीत काही पदाधिकाऱ्यांनी आगामी निवडणुका आपण स्वतंत्र लढले पाहिजे असे मत मांडले असल्याचे अंबादास दानवे यांनी सांगितले.निवडणुका आघाडीत न लढता स्वबळावर लढल्या पाहिजे अशा प्रकारचा सूर काही पदाधिकाऱ्यांचा होता असे अंबादास दानवे यांनी सांगितले ते टिव्ही ९ मराठी या वृत्तवाहीनीशी बोलत होते.त्यामुळे विधानसभेत आलेल्या अपयशानंतर यापुढे ठाकरे गट आगामी महापालिकेच्या निवडणुका स्वतंत्र लढणार असल्याची चर्चा राजकीय वर्तुळात सुरु झाली आहे.