‘निवडणूक आयोग मोदींच्या घराबाहेरचे श्वान’ !! काँग्रेस नेते भाई जगताप वादग्रस्त विधानावर ठाम !!

नवी दिल्ली-पोलीस नायक (वृत्तसेवा) :-

दि.३० नोव्हेंबर २४ शनिवार

विधानसभा निवडणुकीत काँग्रेस पक्षाला सर्वाधिक फटका बसला असून १०१ जागा लढवूनही काँग्रेसला केवळ १६ ठिकाणी विजय मिळवणे शक्य झाले त्यानंतर काँग्रेसकडून ईव्हीएम मशीनवर खापर फोडण्यात येत आहे.ईव्हीएममध्ये फेरफार आणि सायंकाळी शेवटच्या तासात ७६ लाख मतदान वाढल्यामुळे मविआचा पराभव झाला अशी कारण मीमांसा काँग्रेसकडून केली जात आहे.त्यातच आता काँग्रेसचे विधानपरिषदेचे आमदार भाई जगताप यांनी एक वादग्रस्त विधान केले असून निवडणूक आयोग हा पंतप्रधान नरेंद्र मोदी यांच्या घराबाहेर बसलेला श्वान आहे अशी टीका भाई जगताप यांनी केली होती व या विधानावर चौफेर टीका झाल्यानंतरही ते या विधानावर ठाम असल्याचे त्यांनी म्हटले आहे.आयएएनएस वृत्तसंस्थेशी बोलताना भाई जगताप म्हणाले,“मी ४५ वर्षांपासून राजकारणात असून महाराष्ट्रात विधानसभेचा निकाल लागला तो अनपेक्षित आहे.महायुती सरकारने एवढे मोठे काही काम केले नव्हते.चार महिन्यांपूर्वी लोकसभा निवडणुकीत लोकांनी त्यांच्या विरोधात भूमिका घेतली होती.मी आधीपासून सांगत आलो आहे की हा सर्व ईव्हीएमचा खेळ आहे.आज नाही तर उद्या यावर चर्चा व्हायलाच हवी म्हणूनच काँग्रेसने पुन्हा मतपत्रिकेवर निवडणूक घेण्याचे आवाहन केले आहे.जगातील सर्वात मोठी लोकशाही म्हणून आपल्या देशाकडे पाहिले जाते.जर या लोकशाहीवर जर संशय घेतला जात असेल तर त्याचे उत्तर निवडणूक आयोग आणि केंद्र सरकारला द्यावेच लागेल.”