गृहखाते देण्यास भाजपाचा नकार !! शिवसेनेला ‘या’ खात्यांचा दिला पर्याय !!

मुंबई-पोलीस नायक (वृत्तसेवा) :-

दि.०९ डिसेंबर २४ सोमवार

राज्यात सरकार स्थापन झाले असले तरीही खातेवाटप रखडल असून कोणत्या पक्षाला किती आणि कोणते खाते मिळणार याकडे अवघ्या राज्याचे लक्ष आहे.एकनाथ शिंदे मुख्यमंत्रीपदावर अडून होते परंतु त्यांना उपमुख्यमंत्रीपदी देण्यात आले तर दुसरीकडे ते गृहखात्यावरही अडून आहेत असे सांगितले जात आहे. दरम्यान भाजपा गृहखाते सोडण्यास तयार नसल्याचे वृत्त असून इंडियन एक्स्प्रेसने यासंदर्भातील वृत्त दिले आहे.गृहखात्याच्या मोबदल्यात त्यांना महसूल,नगरविकास आणि सार्वजनिक बांधकाम खाते भाजपाने देऊ केले आहेत तर अजित पवारांकडे आधीच वित्तखाते आहे.भाजपामधील उच्चपदस्थ सूत्रांनी सांगितले की,भाजपाने आपला मित्रपक्ष असलेल्या शिवसेनेला गृहमंत्रालय देऊ शकत नसल्याचे स्पष्ट केले आहे.५ डिसेंबर रोजी भाजपा नेते देवेंद्र फडणवीस यांनी पंतप्रधान नरेंद्र मोदी यांच्या उपस्थितीत मुंबईतील आझाद मैदानावर मुख्यमंत्रीपदाची शपथ घेतली व त्यांच्याबरोबर शिंदे आणि पवार यांनी उपमुख्यमंत्रीपदाची शपथ घेतली.फडणवीस यांनी प्रसारमाध्यमांना सांगितले की,१६ डिसेंबरपासून नागपुरात सुरू होणाऱ्या हिवाळी अधिवेशनापूर्वी मंत्रिमंडळाचा विस्तार होणार आहे.७ ते ९ डिसेंबर या तीन दिवसीय विशेष अधिवेशनाच्या समाप्तीनंतर मंत्रिमंडळाचा विस्तार केव्हाही होईल असे संकेत भाजपाच्या सूत्रांनी दिले.एकनाथ शिंदे यांनी मुख्यमंत्रीपद सोडल्याने त्यांना गृहखाते मिळावे अशी मागणी शिवसेनेकडून केली जात आहे.गुलाबराव पाटील,संजय शिरसाट,भरत गोगावले यांच्यासह अनेक शिवसेनेच्या नेत्यांनी शिंदे यांना गृहमंत्रिपद मिळावे अशी आग्रही मागणी केली आहे तर २८८ पैकी १३२ जागा जिंकणारा सर्वात मोठा पक्ष असलेल्या भाजपाने गृहमंत्रालय आणि मुख्यमंत्रिपदावर आपला हक्क सांगितला आहे.फडणवीस म्हणाले,“केंद्रात भाजपाच्या नेतृत्वाखाली आमचे सरकार आहे.दिल्लीत केंद्रीय गृहमंत्रालय भाजपा (अमित शाह) कडे आहे त्यामुळे एकाच पक्षाकडे गृहमंत्रिपद कायम ठेवल्याने समन्वय साधण्यास मदत होते.”