छगन भुजबळ भाजपात प्रवेश करणार असल्याच्या अफवेवर गिरीश महाजन यांची स्पष्टोक्ती !!
मुंबई-पोलीस नायक (वृत्तसेवा) :-
दि.२५ जानेवारी २५ शनिवार
महायुती सरकारच्या मंत्रिमंडळातून डावल्यानंतर राष्ट्रवादी काँग्रेसचे (अजित पवार) नेते छगन भुजबळ यांनी जाहीर नाराजी व्यक्त केली होती व ते नाराजी व्यक्त करून थांबले नाहीत तर त्यांनी उपमुख्यमंत्री अजित पवार यांच्यावर नाव घेत थेट टीका देखील केली होती.मंत्रिमंडळात स्थान न मिळाल्यामुळे भुजबळांनी मुख्यमंत्री देवेंद्र फडणवीस यांची भेट घेतल्याचे सांगितले जात होते त्यामुळे छगन भुजबळांच्या मनात नेमके काय चाललय ? याबाबत वेगवेगळ्या चर्चा रंगत आहेत.दरम्यान काल शुक्रवारी (२४ जानेवारी) केंद्रीय गृह व सहकार मंत्री अमित शाह महाराष्ट्र दौऱ्यावर होते व यावेळी नाशिक जिल्ह्यातील मालेगावातील एका कार्यक्रमात अमित शाह आणि छगन भुजबळ हे व्यासपीठावर शेजारी बसलेले पाहायला मिळाले.शाह यांनी स्वतःहून भुजबळांना त्यांच्या शेजारची खुर्ची दिली.भुजबळ भाजपात जाणार असल्याच्या चर्चेदरम्यान शाह यांनी केलेल्या या कृतीने सर्वांचे लक्ष वेधले आहे.दरम्यान यावर जलसंपदा मंत्री गिरीश महाजन यांनी प्रतिक्रिया दिली असून मालेगावमधील कार्यक्रम भारतीय जनता पार्टीचा नव्हता,तो शासकीय कार्यक्रम होता त्यामुळे तिथे सर्वच पक्षांचे लोक होते असे गिरीश महाजन म्हणाले आहेत.तसेच “त्या कार्यक्रमात अमित शाह यांनी छगन भुजबळ यांना खुर्ची दिली असेल तर त्यात गैर काहीच नाही” असेही महाजन म्हणाले.
