भाजपचे ज्येष्ठ आमदार सुधीर मुनगंटीवार यांनी या चर्चेत भाग घेताना राज्य सरकारने लॉटरीच्या माध्यमातून उत्पन्न वाढवावे अशी सूचना केली होती व त्यासाठी त्यांनी केरळसह अन्य राज्यांना लॉटरीपासून मिळणाऱ्या महसुलाची माहिती दिली.या मागणीची दखल घेत अजित पवार यांनी आपल्या उत्तरात सर्व प्रकारच्या लॉटरीच्या माध्यमातून राज्याचे उत्पन्न वाढवण्यासाठी सुधीर मुनगंटीवार यांच्या अध्यक्षतेखाली सर्वपक्षीय आमदारांची समिती नेमण्यात येईल असे सांगितले.राज्याचे स्थूल उत्पन्न ४९ लाख ३९ हजार कोटी रुपये आहे.सरकारची महसुली तूट ही १ टक्क्याच्या आत आहे.२०१५ मध्ये राज्याचे स्थूल उत्पन्न १२ लाख ८० हजार कोटी रुपये असतांना महसुली तूट १ टक्के होती.वर्ष २०२४-२५ या चालू आर्थिक वर्षात अर्थसंकल्पीय तरतुदीपैकी कमी रक्कम खर्च झाली कारण या वर्षात लोकसभा आणि विधानसभा या दोन निवडणुका आल्या व त्यांच्या आचारसंहितेमुळे चार महिने खर्चावर बंधने होती.आजपर्यंत तरतुदीपैकी ७७.२६ टक्के खर्च झाल्याचे मंत्री पवार यांनी सांगितले.