“शिवरायांच्या आंतरराष्ट्रीय स्मारकासाठी एकाही रुपयाची तरतूद केलेली नाही” !! उदयनराजे भोसलेंचा सरकारला घरचा आहेर !!

छत्रपती शिवाजी महाराज आणि छत्रपती संभाजी महाराजांबाबत आक्षेपार्ह विधान केली जातात व या विरोधात सरकारने कडक कायदा करण्याची मागणी उदयनराजे भोसले यांनी केली तसेच हा कायदा पारित करण्यासाठी विशेष अधिवेशन बोलावण्याची मागणी त्यांनी केली.या संदर्भात बोलतांना उदयनराजे भोसले म्हणाले की, “माझे असे म्हणणे आहे की जर त्यांनी विशेष अधिवेशन बोलावले नाही तर याचा अर्थ असा होईल की छत्रपती शिवाजी महाराज आणि छत्रपती संभाजी महाराज यांचा अवमान व्हावा ही त्यांची सर्वांची इच्छा दिसते.मग लोकांनी यांना त्यांची जागा दाखवून द्यावी असे उदयनराजे भोसले यांनी म्हटले.तुम्ही ज्या पक्षाचे खासदार आहात त्याच पक्षाचे सरकार आहे व त्याच पक्षाचे मुख्यमंत्री आहेत.मग मुख्यमंत्री तुमचे ऐकत नाहीत असे तुम्हाला वाटते का ? असा सवाल माध्यमांच्या प्रतिनिधींनी विचारला,यावर उदयनराजे भोसले म्हणाले की,एक लक्षात घ्या,वारंवार किती वेळा सांगायचे ? एकदा सांगितले,दोनदा सांगितले.त्यांना सर्वांना कळायला हवे ना ? ते काय बोळ्याने दूध पितात का ? जेव्हा छत्रपती शिवाजी महाराज आणि छत्रपती संभाजी महाराजांचा अवमान होतो तेव्हा त्यांना दिसत नाही का ? दंगली होतात,  अनेकांचे प्राण जातात.याला कारणीभूत कोण ? जर तुम्ही कायदा पारित केला नाही तर हेच सर्व यासाठी जबाबदार आहेत असे म्हणत उदयनराजे भोसले यांनी टीका केली.

वाघ्या कुत्र्याच्या समाधी संदर्भातील तुम्ही तुमची भूमिका स्पष्ट केली नाही,असा प्रश्न विचारण्यात आला असता यावर खासदार उदयनराजे भोसले म्हणाले,“वाघ्या,वाघ्या, कोण वाघ्या ? येथे एकच वाघ होऊन गेले ते म्हणजे छत्रपती शिवाजी महाराज आणि छत्रपती संभाजी महाराज तसेच वाघ्या कुत्र्याच्या समाधीबाबत एक इतिहासकारांची समिती नेमली पाहिजे.मग ती समाधी तिथे कधी आली ? का आली ? इतिहासात तर अशी नोंद नाही.काहीका असेना पण त्या माध्यमातून योग्य तो निर्णय घ्यावा” असे उदयनराजे भोसले यांनी म्हटले आहे.“छत्रपती शिवाजी महाराज आणि छत्रपती संभाजी महाराजांना तुम्ही आधारस्तंभ मानता ना ? मग अजून त्यांचा शासन मान्य इतिहास प्रकाशित का झाला नाही ? अनेक महापुरुषांचा शासन मान्य इतिहास मान्य झाला. पण तुम्ही छत्रपती शिवाजी महाराजांनाच विसरलात?”, असे उदयनराजे भोसले यांनी म्हटले.तसेच मराठ्यांच्या ज्या राजधान्या होत्या,राजगड असेल किंवा रायगड,सातारा यासाठी एक शिव स्वराज्य सर्केट स्थापन केले पाहिजे” अशी मागणी देखील उदयनराजे भोसले यांनी केली आहे.