पाडळसे येथे तरुणाईच्या पुढाकारातून “गाव आपला-उत्सव आपला” हा एकतेचा संदेश देत रामनवमी उत्साहात साजरी !!

सुरज सपकाळे,पोलीस नायक

पाडळसे ता.यावल (प्रतिनिधी) :-

दि.०७ एप्रिल २५ सोमवार

तालुक्यातील पाडळसे येथे काल दि.६ एप्रिल २५ रोजी प्रभू श्रीराम नवमीचा उत्सव अतिशय भक्तिभावाने आणि उत्साहात साजरा करण्यात आला.विविध व सर्व जाती-धर्मातील ग्रामस्थ आणि विशेषतः उत्साही तरुणांच्या पुढाकारामुळे प्रथमच गावात इतक्या भव्य प्रमाणावर हा उत्सव मोठ्या उत्साहात साजरा करण्यात आला.परिणामी या जल्लोषात संपूर्ण गाव भक्तिमय वातावरणाने न्हालेला दिसून आला हे विशेष !.

दरम्यान काल दि.६ एप्रिल २५ रोजी संध्याकाळी संपूर्ण गाव विद्युत रोषणाईने उजळून गेला होता.यात मुख्य रस्ते,देवस्थान परिसर,मंदिर आणि चौकात आकर्षक लायटिंग लावण्यात आली होती परिणामी विविध रंगांच्या रोषणाईमुळे संपूर्ण परिसर एक वेगळाच सौंदर्यदृष्ट्या आनंददायी अनुभव देत होता.उत्सवाचे विशेष वैशिष्ट्य म्हणजे कोणतीही संस्था किंवा राजकीय पक्ष सहभागी न होता,”गाव आपला-उत्सव आपला” या भावनेतून गावातील तरुणांनी स्वतःहून सर्व सजावट,शोभायात्रा आणि धार्मिक कार्यक्रमांचे आयोजन केले.शोभायात्रेला श्रीराम मंदिरातून सुरुवात झाली आणि ती छत्रपती शिवाजी महाराज चौकात पोहोचली ‘जय श्रीराम’ च्या घोषणांनी आसमंत दुमदुमून गेला.लहानांपासून वृद्धांपर्यंत सर्वांनी या यात्रेत उत्स्फूर्त सहभाग घेतला.सकाळी मंदिरात श्रीरामाची आरती करण्यात आली त्यानंतर महाप्रसादाचे आयोजन करण्यात आले होते.विशेष म्हणजे स्वयंसेवकांनी महाप्रसाद घरोघरी पोहोचवून समाजातील एकोपा आणि बंधुभावाचे दर्शन घडवले.गावातील ज्येष्ठ नागरिकांनी या उपक्रमाचे भरभरून कौतुक केले असून अशा प्रकारचे कार्यक्रम दरवर्षी आयोजित व्हावेत अशी इच्छा व्यक्त केली.या उत्सवामुळे गावात नवचैतन्य निर्माण झाले असून तरुणाईच्या पुढाकारातून समाजात एकतेचा सुंदर संदेश प्रसारित झाला आहे.