देशाचे रक्षण करतांना वीर जवान शहीद !! मुरली नाईक यांना साश्रुनयनांनी अखेरचा निरोप !!

दरम्यान मूळ आंध्र प्रदेशचे रहिवाशी असलेले मुरली नाईक हे आपल्या आईवडिलांसोबत काही वर्षांपासून घाटकोपर येथील कामराज नगरमध्ये वास्तव्याला होते.यात त्यांचे वडिलांनी मजुरी व आईने घरकाम करून मुरली नाईक यांना वाढवून शिक्षणाचे धडे दिले.परिणामी अशा बिकट परिस्थितीत मुरली नाईक यांनी शिक्षण पूर्ण करून लष्करात भरती होण्याचा निर्णय घेतला व सन २०२२ मध्ये त्यांची ‘अग्निवीर’ योजनेतून लष्करात जवान म्हणून नियुक्त झाली.नाशिक,देवळाली येथील प्रशिक्षण आटोपून त्यांना सुरवातीला आसाम येथील सीमावर्ती भागात नियुक्त करण्यात आले व त्यानंतर पंजाब येथे तसेच पहलगाम हल्ल्यानंतर भारत-पाकिस्तान दरम्यान लष्करी कारवायांना तोंड फुटताच त्यांना काश्मीर खोऱ्यात कर्तव्यासाठी बोलावणे आले.मुरली नाईक शहीद झाल्याचे कळताच त्यांचे नातेवाईक,मित्रपरिवार,शेजारी व परिचितांनी त्यांच्या घराबाहेर गर्दी केली.यावेळी कामराज नगरबरोबरच आजुबाजूच्या परिसरातील नागरिक जमा झाले व शहीद मुरली नाईक यांचा पराक्रम सांगणारे तसेच श्रद्धांजली वाहणारे पोस्टर व बॅनर घाटकोपर येथे झळकले.दरम्यान मुरली नाईक यांची आई याबाबत म्हटले आहे की,पंजाबचा तळ सोडतांना मुरलीने मला फोन केला होता व सध्याचा तणाव पाहता एकुलता एक मुलगा काश्मीरमध्ये जाणार या विचाराने पोटात गोळा आला होता.अवेळी आलेला प्रत्येक फोन घेतांना माझ्या काळजाचा थरकाप उडत असे व अखेर आमची ही भीती खरी ठरली असल्याचे म्हटले आहे.तर मुरलीच्या वडिलांनी प्रतिक्रिया देतांना म्हटले आहे की,‘देशाचे रक्षण करतांना तुमचा पुत्र व आमचे सहकारी मुरली शहीद झाले आहेत’ अशी दुःखद बातमी लष्करी अधिकाऱ्याने काल शुक्रवारी मला कळवली.परिणामी माझ्या पायाखालची जमीन सरकली व माझ्या चेहऱ्यावरील हावभाव पाहून मुरलीची आई चक्कर येऊन कोसळली.शहीद मुलाबाबत सांगताना मुरली यांचे वडील श्रीराम यांना यावेळी अश्रू अनावर झाले.