यावल-पोलीस नायक (प्रतिनिधी) :-
दि.२५ ऑगस्ट २५ सोमवार
तालुक्यातील फैजपूर-हंबर्डी मार्गावरील चोरवड येथे काल दि.२४ ऑगस्ट रविवार रोजी प्रमोद लहानू रजाने यांचा दुर्दैवी अपघात झाला होता व हा अपघात झाल्यानंतर काही काळ रस्त्यावर गोंधळाचे वातावरण निर्माण झाले असतांनाच प्रसंगी योगायोगाने या मार्गाने प्रवास करीत असलेले रावेर यावल विधानसभा मतदारसंघाचे आमदार अमोल जावळे यांची नजर या अपघाताकडे गेली.प्रसंगी अपघात ग्रस्ताला पाहताच अमोल जावळे यांनी क्षणाचाही विलंब न करता तातडीने आपली गाडी थांबवली व स्वतः पुढाकार घेत त्यांनी रजाने यांना गाडीत घेतले आणि थेट फैजपूर येथील रुग्णालयात दाखल केले.
दरम्यान रुग्णाला त्वरित वैद्यकीय उपचार मिळावेत यासाठी आमदार जावळे यांनी डॉक्टरांशी संवाद साधून आवश्यक ती सर्व चौकशीही केली.सदरहू अचानक घडलेल्या या प्रसंगात आमदार अमोल जावळे यांनी दाखवलेली तत्परता आणि संवेदनशीलता ही केवळ मदत नसून खरी माणुसकीचे दर्शन घडवणारी आहे.सामाजिक बांधिलकीची जाणीव ठेवून संकटाच्या क्षणी सर्वसामान्यांच्या मदतीसाठी धाव घेणारा नेता म्हणजेच खरा जनसेवक आमदार अमोल जावळे अशी भावना स्थानिक नागरिकांतून व्यक्त होत आहे.
