शिंदे गटात गेलेल्या आमदारांमुळेच सुषमा अंधारे या अंधारातून उजेडात आल्या

आ.किशोर पाटील यांचा सुषमा अंधारे यांना खोचक टोला

By टीम पोलीस नायक On Oct 31, 2022 0

जळगाव-पोलीस नायक(प्रतिनिधी):-

आपल्या आक्रमक शैलीतील भाषणामुळे गेल्या काही दिवसांपासून चर्चेत आलेल्या शिवसेना उद्धव बाळासाहेब ठाकरे या पक्षाच्या नेत्या सुषमा अंधारे या राज्यभर दौरे करत मुख्यमंत्री एकनाथ शिंदे यांच्याबरोबर गेलेल्या आमदारांवर जोरदार टीका करत आहेत याच सुषमा अंधारे यांना शिंदे गटातून पाचोरा तालुक्याचे आमदार किशोर पाटील यांनी प्रत्युत्तर दिले आहे.शिंदे गटात गेलेल्या आमदारांमुळेच सुषमा अंधारे या अंधारातून उजेडात आल्या असून त्यांनी आम्हा सर्व आमदारांचे आभार मानावेत असा टोला किशोर पाटील यांनी लगावला आहे.सुषमा अंधारे या उद्या जळगाव जिल्ह्याच्या दौऱ्यावर आहेत.तसेच २ नोव्हेंबर रोजी पाचोरा तालुक्यात त्यांचा मेळावा होत आहे या पार्श्वभूमीवर पाचोरा तालुक्याचे आमदार किशोर पाटील यांनी त्यांच्यावर निशाणा साधला आहे.

‘सुषमा अंधारे यांचे मी स्वागत करतो तीन महिन्यांपूर्वी अंधारे या कुठे होत्या?त्या अंधारात सुद्धा दिसत नव्हत्या आम्ही बंड केले व ४० आमदार शिंदे गटात गेलो त्यामुळे अंधारे या उजेडात आल्या त्यामुळे अंधारे यांनी आम्हा सर्व आमदारांचे आभार मानावेत असे पाटील यांनी म्हटले आहे.दरम्यान आमदार किशोर पाटील यांनी केलेल्या या टीकेवर सुषमा अंधारे या २ नोव्हेंबर रोजी पाचोरा येथे होणाऱ्या मेळाव्यात काय पलटवार करतात हे पाहणे महत्त्वाचे ठरणार आहे.