४ लाख ११ हजारांच्या १८ मोबाईलचा शोध !! माळेगाव पोलिसांची दमदार कामगिरी !!

सनी पटेल,पोलीस नायक

बारामती जिल्हा (प्रतिनिधी) :-

दि.०१ मार्च २६ सोमवार

तालुक्यातील माळेगाव पोलीस ठाणे यांच्या उल्लेखनीय कामगिरीमुळे तब्बल ४ लाख ११ हजार रुपये किमतीचे हरवलेले १८ मोबाईल शोधून नागरिकांना परत करण्यात आले आहेत. या कारवाईमुळे सर्वसामान्य नागरिकांमध्ये समाधानाची भावना निर्माण झाली आहे.

दि. २८ फेब्रुवारी २०२६ रोजी प्रसिद्ध करण्यात आलेल्या प्रेस नोटनुसार, पुणे ग्रामीण पोलीस दलाच्या मार्गदर्शनाखाली हरवलेल्या मोबाईल संदर्भातील तक्रारींची सखोल छाननी करण्यात आली. तांत्रिक विश्लेषण, सीडीआर तपासणी व लोकेशन ट्रॅकिंगच्या आधारे विविध ठिकाणांहून मोबाईल हस्तगत करण्यात आले.

ही कारवाई पुणे ग्रामीण पोलीस यांच्या मार्गदर्शनाखाली पार पडली. पोलीस अधीक्षक श्री. संदीप सिंह गिल, अपर पोलीस अधीक्षक व संबंधित वरिष्ठ अधिकाऱ्यांच्या सूचनेनुसार तपास पथकाने वेगाने हालचाली करून ही यशस्वी कामगिरी केली.

पोलीस निरीक्षक यांच्या नेतृत्वाखालील पथकाने तक्रारदारांशी सातत्याने संपर्क ठेवत शोधमोहीम राबवली. तांत्रिक कौशल्य आणि वेगवान प्रतिसादामुळे अल्पावधीत १८ मोबाईल हस्तगत करण्यात यश आले.

माळेगाव पोलीस ठाण्याने स्थापनेपासून आतापर्यंत सुमारे २० लाख २२ हजार रुपये किमतीचे १०७ मोबाईल शोधून नागरिकांना परत दिले आहेत. त्यामुळे पोलिसांच्या कार्यक्षमतेवर नागरिकांचा विश्वास अधिक दृढ झाला आहे.

मोबाईल परत मिळाल्यानंतर नागरिकांनी पोलिसांचे आभार मानत त्यांच्या कार्याचे कौतुक केले. हरवलेल्या वस्तूंचा शोध घेऊन त्या मूळ मालकांना परत देण्याची ही कारवाई म्हणजे पोलिसांच्या जनतेप्रती असलेल्या बांधिलकीचे उत्तम उदाहरण ठरली आहे.