सुप्रियाताई बद्दल वापरलेले अपशब्द २४ तासाच्या आत दिलगिरी व्यक्त करून परत घ्या नाहीतर महाराष्ट्रात फिरणे अवघड होईल-राष्ट्रवादी काँग्रेस आक्रमक

मुंबई-पोलीस नायक(वृत्तसेवा):- 

शिंदे गटाचे आमदार आणि राज्याचे कृषीमंत्री अब्दुल सत्तार यांनी राष्ट्रवादी काँग्रेसच्या खासदार सुप्रिया सुळे यांच्यावर अत्यंत खालच्या भाषेत टीका केल्याने राज्यातील वातावरण तापले आहे.अब्दुल सत्तार यांचे सुप्रिया सुळेंविषयीचे वक्तव्य सोशल मीडियावर व्हायरल झाल्यानंतर राष्ट्रवादी काँग्रेसच्या नेत्यांनी सोशल मीडियावरून आणि प्रसारमाध्यमांवर एकापाठोपाठ एक आक्रमक प्रतिक्रिया देण्याचा सपाटा लावला आहे यापैकी आमदार अमोल मिटकरी यांनी अब्दुल सत्तार यांना निर्वाणीचा इशारा दिला आहे.अब्दुल सत्तार आम्ही तुम्हाला मोठे अलंकार देऊन बोलु शकतो मात्र आमच्या पक्षाची ती संस्कृती नाही.आदरणीय सुप्रियाताई बद्दल वापरलेले अप शब्द २४ तासाच्या आत दिलगिरी व्यक्त करून परत घ्या नाहीतर तुम्हाला महाराष्ट्रात फिरणे अवघड होईल असे ट्विट अमोल मिटकरी यांनी केले आहे.

एका मराठी वृत्तवाहिनीशी संवाद साधताना अब्दुल सत्तार यांनी राष्ट्रवादी काँग्रेसच्या खासदार सुप्रिया सुळे यांच्याबद्दल वादग्रस्त वक्तव्य केले आहे.अब्दुल सत्तार यांनी “इतकी भिकारXX झाली असेल सुप्रिया सुळे तर त्यांनाही (खोके) देऊ”, असे म्हटले आहे यानंतर पुन्हा एकदा सत्तार यांनी “ते आम्हाला खोके बोलू लागले आहेत,आमचे खोके त्यांचे डोके तपासावे लागेल,ज्यांचे डोके तपासावे लागेल खोक्याची आठवण येऊ लागली आहे त्यांच्यासाठी सिल्लोडमध्ये दवाखाना उघडावा लागेल.त्या दवाखान्यात खोके खोके बोलतात त्यांचे डोके तपासावे लागले हे भिकारXX लोक,राजकारणच भिकारी धंदा आहे.आम्ही दररोज लोकसभा,विधानसभेसाठी मतांची भीक मागतो असे वक्तव्य अब्दुल सत्तार यांनी केले आहे.

महाराष्ट्रातील अनुभवी मंत्र्याने घाणेरड्या पातळीवर जाऊन बोलणे चुकीचे आहे.अब्दुल सत्तार यांच्या वक्तव्याचा काँग्रेस पक्षातर्फे निषेध करीत आहे.सत्तार यांनी या प्रकरणी जाहीर माफी मागावी असे काँग्रेस नेत्या यशोमती ठाकूर यांनी म्हटले आहे.राष्ट्रवादी काँग्रेसच्या पुण्यातील नेत्या रुपाली ठोंबरे यांनी अब्दुल सत्तार यांना महाराष्ट्रात फिरू देणार नाही असा इशारा दिला आहे.सत्तार यांनी या प्रकरणी माफी मागावी असा इशारा रुपाली ठोंबरे यांनी म्हटले आहे.तर भाजपच्या नेत्या पंकजा मुंडे यांनी अब्दुल सत्तार यांच्या वक्तव्याविषयी नाराजी व्यक्त केली आहे.कोणत्याही व्यक्तीने महिला किंवा पुरुषांविषयी आदरयुक्त टीका केली पाहिजे.खालच्या पातळीवर जाऊन टीका करू नये तसेच प्रसारमाध्यमांनीही अशा वक्तव्यांचे भांडवल करु नये असे पंकजा मुंडे यांनी म्हटले आहे.