मुंबई-पोलीस नायक(वृत्तसेवा):-
गुजरात विधानसभा निवडणुकीत भाजपा,काँग्रेस आणि आप अशी तिरंगी लढत झाली मात्र निकालात भाजपाला मोठे यश मिळताना दिसत आहे यानंतर अनेक राजकीय प्रतिक्रिया येत आहे.राज्याचे मुख्यमंत्री एकनाथ शिंदे यांनीही गुजरात निकालावर प्रतिक्रिया व्यक्त करताना पंतप्रधान नरेंद्र मोदी आणि गृहमंत्री अमित शाह यांचे अभिनंदन केले ते आज ८ डिसेंबर रोजी मुंबईत पत्रकारांशी बोलत होते.एकनाथ शिंदे म्हणाले,मी गुजरात विधानसभा निवडणुकीच्या निकालासाठी पंतप्रधान मोदी,गृहमंत्री शाह आणि गुजरातच्या नागरिकांचे अभिनंदन करतो. एक चांगला निकाल आला आहे.भाजपाला गुजरातमध्ये १५० पेक्षा अधिक जागा मिळाल्या आहेत.उपमुख्यमंत्री देवेंद्र फडणवीस आणि त्यांची टीमही गुजरातमध्ये प्रचारासाठी गेले होते त्यांचेही मी मनापासून अभिनंदन करत आणि सर्वांना शुभेच्छा देतो.
मोदींची जादू देशात आणि विदेशात सगळीकडे आहे.आज आपल्याला जी-२० चे अध्यक्षपदही मिळाले आहे हे आपल्या देशासाठी गौरवास्पद आहे.जी-२० चे नेतृत्व मोदींनी करणे हीदेखील देशवासीयांसाठी अभिमानाची बाब आहे.महाराष्ट्रातही मुंबईसह चार जिल्ह्यांमध्ये १४ बैठका आहेत त्यामुळे मुंबई आणि महाराष्ट्राचे ब्रँडिंग करण्याची संधी प्राप्त झाली आहे असे मत एकनाथ शिंदे यांनी व्यक्त केले.गुजरातची पुनरावृत्ती महाराष्ट्रात होणार का?असा प्रश्न पत्रकारांनी एकनाथ शिंदेंना विचारला त्यावर ते म्हणाले आज आम्ही महाराष्ट्रात भरपूर काम करत आहोत. मुंबईचे सुशोभिकरण सुरू आहे.मुंबई स्वच्छ,सुंदर करून कायापालट झाला पाहिजे.मुंबई आंतरराष्ट्रीय दर्जाचे शहर आहे.मुंबई आपल्या देशाची आर्थिक राजधानी आहे.
