विधानसभा अध्यक्षांबद्दल अपशब्द वापरल्याने जयंत पाटील अधिवेशन संपेपर्यंत निलंबित
आपल्याला निलंबित केले तरी राज्यातील तरुणांच्या,शेतकऱ्यांच्या,कष्टकऱ्यांच्या,महिलांच्या प्रश्नांसाठी लढतच राहणार असल्याचे सांगत जयंत पाटील यांनी सरकार हुकूमशाही पद्धतीने वागत असल्याचा आरोप केला.दिशाभूल करणारे विषय सभागृहात उपस्थित करून सभागृहाचा मौल्यवान वेळ सत्ताधारी पक्षातील आमदार वाया घालवत होते.विरोधकांना बोलण्याची संधीच दिली जात नव्हती तसेच मुख्यमंत्र्यांनी केलेले बेकायदेशीर भूखंड वाटप व गैरव्यवहाराबद्दल आम्ही उपस्थित करत असलेली चर्चा टाळण्याचा सत्ताधाऱ्यांकडून प्रयत्न होत होता म्हणूनच असा निर्लज्जपणा करू नका असे शिंदे-फडणवीस सरकारला उद्देशून म्हणालो असे स्पष्ट करतानाच विरोधकांचा आवाज दाबण्याच्या आणि विरोधकांवर वचक बसवण्याच्या उद्देशाने सरकारने मी असे विधान अध्यक्षांना उद्देशून बोलल्याचा बनाव केल्याचा दावाही त्यांनी केला.जयंत पाटील यांच्याकडून अनावधानाने हा शब्द गेल्याचे सांगत झाल्या प्रकाराबद्दल विरोधी पक्षनेते अजित पवार यांनी दिलगिरी व्यक्त केली.पाटील हे सभगृहातील ज्येष्ठ सदस्य आहेत त्यांच्याकडून सहसा असा शब्दप्रयोग होत नाही.अध्यक्षांबद्दल आमच्या मनात आदरच आहे त्यामुळे कोणताही गैरसमज होऊ नये.पण जेव्हा वारंवार विनंती करूनही आम्हाला बोलायची परवानगी दिली जात नाही त्याचवेळी सत्ताधारी आमदारांना एकतर्फी संधी दिली जाते.आम्ही कामकाज करण्यासाठी सहकार्य करत आहोत त्याचवेळी सत्ताधारी पक्षाचे आमदार गोंधळ घालून कामकाज बंद पाडत असतील तर तोल जाऊ शकतो हा प्रकार अनावधानाने घडला आहे तरी घडल्या प्रकाराबद्दल मी सभागृहाची दिलगिरी व्यक्त करतो असे सांगत पवार यांनी हे निलंबन मागे घेण्याबाबत विचार व्हावा अशी विनंतीही केली त्यानंतर या निलंबनाच्या निषेधार्थ विरोधकांनी सभात्याग केला.
