पिठाच्या भांड्यात पडून नऊ महिन्याच्या चिमुकल्याचा गुदमरून मृत्यू

याबाबत पोलिस सूत्रांकडून मिळालेली माहिती अशी की,कोल्हापुर जिल्ह्यातील जुना वाशीनाका येथे राहात असलेल्या सुप्रिया राजाराम यमगर या आपला नऊ महिन्याचा मुलगा कृष्णराज याला घेऊन करवीर तालुक्यातील वडणगे येथे आपल्या आजीकडे आल्या होत्या.दरम्यान संध्याकाळच्या सुमारास कृष्णराज वॉकरमधून चालत खेळत होता.त्यावेळी चालता-चालता त्याचा गव्हाच्या पिठाच्या भांड्यात तोल गेला व  तो त्यात पडला.भांड्यामध्ये पीठ मोठ्या प्रमाणात असल्याने कृष्णराजच्या तोंडात व नाकात गव्हाचे पीठ गेले आणि ते पीठ त्याच्या नाका-तोंडात चिकटून बसले.दरम्यान आजीने त्याला त्वरित त्या भांड्यातून बाहेर काढले व नाका तोंडात पीट गेल्याचे लक्षात येताच त्याला कुटुंबीयांनी तत्काळ रुग्णालयात दाखल केले.मात्र दवाखान्यात नेण्यापूर्वीच नाकात आणि तोंडात पिठ चिकटल्यामुळे चिमुकल्याचा गुदमरून मृत्यू झाल्याचे डॉक्टरांनी सांगितले.नऊ महिन्यांच्या बालकाचा असा दुर्दैवी मृत्यू झाल्याने कुटुंबीयांनी हंबरडाच फोडला तर परिसरात याबाबतची माहिती करतात सर्वांमधून हळहळ व्यक्त होऊ लागली. दरम्यान, आता या घटनेची करवीर पोलिस ठाण्यात नोंद झाली आहे.