“त्यांनी चौकटीत राहून बोलावे अन्यथा सभेत घुसणार”-गुलाबराव पाटील यांचा ठाकरे गटाला इशारा

जळगाव-पोलीस नायक(प्रतिनिधी):-

माजी मुख्यमंत्री व शिवसेना (ठाकरे गट) पक्षप्रमुख उद्धव ठाकरे हे २३ एप्रिलला जळगाव जिल्हा दौऱ्यावर येणार असून २३ एप्रिलला उद्धव ठाकरे यांची जळगाव जिल्ह्यातील पाचोरा येथे विराट सभा होणार आहे.माजी आमदार स्वर्गीय आर.ओ.पाटील यांच्या कन्या व ठाकरे गटाच्या नेत्या वैशाली सूर्यवंशी यांनी या विराट सभेचे आयोजन केले आहे.उद्धव ठाकरे यांच्या यापूर्वीही छत्रपती संभाजीनगर,खेड,मालेगाव येथे जाहीर सभा झाल्या आहेत या सभांमध्ये उद्धव ठाकरे यांनी या सभांमधून शिंदे सरकारवर तोफ डागली आहे तसेच महागाई,बेरोजगारीसह शेतकऱ्यांच्या मुद्द्यांवर उद्धव ठाकरेंनी राज्य सरकावर टीकास्र सोडले आहे त्यामुळे जळगावच्या सभेत उद्धव ठाकरे कोणाला लक्ष्य करणार? हे पाहणे महत्वाचे ठरणार आहे.

अशात पालकमंत्री गुलाबराव पाटील यांनी ठाकरे गटाला इशारा दिला असून प्रसारमाध्यमांशी बोलताना गुलाबराव पाटील म्हणाले की आर.ओ.पाटील यांचे माझ्यावर फार उपकार होते त्यांच्या पुतळ्याचे अनावरण करण्यासाठी उद्धव ठाकरे येत आहेत.आर.ओ.पाटील यांचे उद्धव ठाकरे यांच्याबरोबर पहिल्यापासून संबंध होते त्या प्रेमापोटी उद्धव ठाकरे येत आहेत.पुतळ्याचे अनावर करण्यासाठी येत असतील तर जिल्ह्यात उद्धव ठाकरेंचे स्वागत आहे परंतु सभेत संजय राऊतांसारखा माणूस माझ्यावर बोलत असेल तर मी एसपींना पत्र देणार आहे त्यांनी चौकटीत राहून बोलावे अन्यथा सभेत घुसणार आहे असा इशारा गुलाबराव पाटलांनी दिला आहे.