“सर्वेच्या माध्यमातून मला व फडणवीसांना पसंती मिळाल्याने आणखी जोमाने काम करू” – जाहिरातीवर मुख्यमंत्र्याची प्रतिक्रिया

मुंबई-पोलीस नायक (वृत्तसेवा) :-

शिवसेनेकडून (शिंदे गट) राज्यातील प्रमुख वृत्तपत्रांमध्ये दिलेल्या जाहिरातीवरून राजकीय वर्तुळात चर्चांना उधाण आले आहे.यापूर्वी महाराष्ट्राच्या राजकारणात ‘देशात नरेंद्र अन् राज्यात देवेंद्र’ अशी घोषणा दिली जात होती पण शिवसेनेकडून ( शिंदे गट ) आज वृत्तपत्रांच्या पहिल्या पानावर देण्यात आलेल्या जाहिरातीवर ‘राष्ट्रामध्ये मोदी,महाराष्ट्रात शिंदे’असा मजकूर छापण्यात आला आहे यावर मुख्यमंत्री एकनाथ शिंदे यांनी प्रतिक्रिया व्यक्त केली आहे.मुंबईत प्रसारमाध्यमांशी बोलताना एकनाथ शिंदे म्हणाले की,आमचे सरकार पंतप्रधान नरेंद्र मोदी यांच्या मार्गदर्शनाखाली काम करत आहे.‘हे डबल इंजिन’चे सरकार आहे.केंद्र सरकारकडून महाराष्ट्रातील विकास प्रकल्पांना मोठ्या प्रमाणात निधी आणि आर्थिक पाठबळ दिले जात आहे त्यामुळे महाविकास आघाडी सरकारच्या काळात मेट्रो,पायाभूत सुविधांचे प्रकल्प बंद होते ते आम्ही तात्काळ सुरू केले.मुंबईतच नाहीतर संपूर्ण राज्यात वेगवान प्रकल्प सुरू आहेत.राज्याला पुढे नेत सर्वांगीण विकास करण्याचा प्रयत्न मी आणि देवेंद्र फडणवीस करत आहे.प्रत्यक्ष रस्त्यावर,शेतकऱ्यांच्या शेतात आणि प्रकल्पाची पाहणी करण्यासाठी जातो.घरात बसून काम करत नाही असा टोला मुख्यमंत्र्यांनी उद्धव ठाकरेंना लगावला आहे.