“हितचिंतकाने जाहिरात दिली असावी,जाहिरातीचा शिवसेनेशी काहीही संबंध नाही”

मंगळवार १३ जून रोजी राज्यातील प्रमुख वृत्तपत्रात एक जाहिरात देण्यात आली आहे.‘देशात मोदी अन् राज्यात शिंदे’ असा संदेश या जाहिरातीतून दिला आहे.यापूर्वी महाराष्ट्राच्या राजकारणात ‘देशात नरेंद्र अन् महाराष्ट्रात देवेंद्र’अशी घोषणा दिली होती परंतु सदरील वृत्तपत्रांच्या पहिल्या पानावर देण्यात आलेल्या जाहिरातीवर ‘राष्ट्रामध्ये मोदी,महाराष्ट्रात शिंदे’असा मजकूर छापण्यात आला आहे या जाहिरातीवरून महाराष्ट्राच्या राजकारणात खळबळ उडाली आहे.या जाहिरात प्रकरणावरून दिवसभर अनेक राजकीय नेत्यांनी प्रतिक्रिया दिली.मुख्यमंत्री एकनाथ शिंदे यांच्यासह शिंदे गटाच्या नेत्यांनी जाहिरातीमधील दाव्याचे समर्थन केले या घडामोडींनंतर शिंदे गटाचे नेते शंभूराज देसाई यांनी घुमजाव केले आहे.आजच्या वर्तमानपत्रात छापून आलेल्या जाहिरातीचा शिवसेनेशी (शिंदे गट) काहीही संबंध नाही. एकनाथ शिंदे आणि देवेंद्र फडणवीसांच्या हितचिंतकांनी ही जाहिरात दिली असावी असे स्पष्टीकरण शंभूराज देसाई यांनी दिले आहे ते प्रसारमाध्यमांशी संवाद साधत होते.संबंधित जाहिरातीवर स्पष्टीकरण देताना शंभूराज देसाई म्हणाले की,वर्तमानपत्रात जी जाहिरात छापून आली आहे त्या जाहिरातीचा शिवसेना पक्षाशी (शिंदे गट) कसलाही संबंध नाही.एकनाथ शिंदे किंवा देवेंद्र फडणवीस या दोन्ही नेत्यांच्या हितचिंतकांनी कदाचित ही जाहिरात दिली असेल पण एक गोष्ट समाधानकारक आहे की पहिल्या आणि दुसऱ्या क्रमांकावर शिवसेना-भाजपाचेच नेते आहेत.शिवसेना-भाजपा युती आणि आमचे मित्रपक्ष ५० टक्क्यांच्या पुढे आहेत हे सर्व्हेवरून दिसले आहे.आमच्यात पहिल्या आणि दुसऱ्या क्रमांकासाठी रस्सीखेच नाही.आमची संयुक्त जबाबदारी आहे.बाळासाहेब ठाकरे आणि अटलबिहारी वाजपेयी यांनी हिंदुत्वाच्या मुद्द्यावर ३० वर्षांपूर्वी जी युती केली होती ती युती पुढे घेऊन जाण्याचे काम आम्ही करत आहोत याला लोकांनी पसंती दिली यातच आम्ही समाधानी आहोत.जाहिरात देणारे हितचिंतक अज्ञात आहेत असेही शंभूराज देसाई म्हणाले.