“मोदींची सत्ता आल्यापासून देशात भोंदूगिरी,बुवाबाजीला महत्त्व” भाजपा नेत्यांच्या वक्तव्यावर ठाकरे गटाचे टीकास्त्र

मोदी युगात अशा बुवाबाजीस महत्त्व मिळाले कारण अशा विज्ञानशून्य हिंदुत्वावरच भारतीय जनता पक्षाची चूल पेटते आहे.मोदी युगात बेरोजगारी,महागाई वाढली असून प्रत्येक वर्षाला दोन कोटी नोकऱ्या निर्माण करण्याच्या त्यांच्या घोषणा हवेत विरल्या.स्वयंपाकाचे गॅस सिलिंडर,आरोग्य,शिक्षण महागले आहे.त्यात आता मोदी काळात महिलांची उंची वाढल्याचे तारे तोडले जात आहेत.जर महिलांची उंची वाढली असेल तर मग गगनाला भिडलेल्या महागाईची,बेरोजगारीची उंची का कमी होऊ नये?मणिपुरात हिंसाचाराची आग भडकली आहे त्या आगीवर शांततेचे पाणी ओतण्याची उंची मोदी सरकारने का गाठू नये?मोदी युगात भ्रष्टाचाराच्या बजबजपुरीने टोकाची उंची गाठली असून महिलांच्या उंचीपेक्षा या भ्रष्टाचाराची उंची दाहक आहे.चीन लडाखच्या सीमा पार करून आमच्या हद्दीत घुसला असून एक इंच जमिनीवरही पाय ठेवू देणार नाही असा पवित्रा अद्यापि आपल्या राज्यकर्त्यांनी ठामपणे घेतल्याचे दिसत नाही.भारताला तोडण्याचे आसुरी शक्तींचे प्रयत्न आहेत असा हल्ला सरसंघचालक मोहन भागवत यांनी केला पण या देशात भागवत वगैरेंच्या विचारांचे वारस असलेले सरकार व पंतप्रधान आहेत तरीही अशा आसुरी शक्ती निर्माण होतात व आव्हान उभे करतात हे आश्चर्यच आहे.मोदी यांची ख्याती विश्वाचे नेते अशी आहे पण स्वदेशात मात्र आसुरी शक्ती देश तोडायला निघाल्या आहेत.सर्वसाधारणपणे विज्ञान आणि धर्म हे परस्परविरोधी आहेत.कोविडवरील लस पंतप्रधान मोदी यांनी शोधून काढली असे भाजपचे नेते सांगतात व अंधभक्त त्यावर टाळ्या वाजवतात हा त्यांचा नवीन धर्म त्यात संशोधक,विज्ञानास स्थान दिसत नाही.गाय ही माता नसून एक उपयुक्त पशू आहे हा वीर सावरकरांचा विचार.मोदी युगात वीर सावरकरांचा हा विज्ञानवादी विचार अंधभक्त मान्य करीत नाहीत पण त्यांना वीर सावरकरांचा वापर राजकीय स्वार्थासाठी करायचा आहे.वीर सावरकरांच्या अखंड हिंदू राष्ट्राच्या कल्पनेत फक्त पाकड्यांच्या ताब्यातील भूभाग नव्हता तर अफगाणिस्तान,चीनने घेतलेला भूभागही आहे याचा भाजपवाल्यांना सोयिस्कररीत्या विसर पडलेला दिसतो आहे असा निशाणाही ठाकरे गटाच्या माध्यमातून साधण्यात आला आहे.

आता मोदी युगात मुलींची उंची वाढली असा ‘शोध’ भाजपच्या मंडळींनी लावला हे विज्ञान आहे की अंधश्रद्धा? यापेक्षा मोदी युगात देशाच्या जनतेची प्रतिष्ठा,मानवी हक्क,संविधान,लोकशाहीची उंची किती वाढली याचे मोजमाप होणे खरे गरजेचे आहे.हिंदू धर्म हा संकुचित नाही पण मोदी युगात हिंदुत्व कमालीचे संकुचित व भयग्रस्त झाल्याचे दिसत आहे.खरे तर हिंदू धर्म हा एकमेव धर्म असा आहे की जो विज्ञानाशी सुसंगत दिसतो.हिंदू धर्म हा विज्ञान,तत्त्वज्ञान आणि अध्यात्मवाद यांचा मिलाफ आहे.धर्म आणि धर्मांधता यात फरक केला पाहिजे.हिंदुत्व हे आता धर्मांधता व बुरसटलेल्या विचारांकडे ढकलले जात असेल तर ते सगळ्यात धोकादायक आहे.’कोविडची ‘लस’ मोदींनी बनवली’! ‘हरियाणातील मुलींची उंची मोदी सत्तेत आल्यामुळे वाढली’अशा प्रकारचे ‘बोल’ हे मेंदूचा ताबा अंधश्रद्धा व अंधभक्तीने घेतल्याचा परिणाम आहे.देशातील सर्व प्रमुख संशोधन,वैज्ञानिक,तांत्रिक संस्थांवर राष्ट्रीय स्वयंसेवक संघाने ताबा घेतला व या संस्थांच्या मोक्याच्या जागी संघ विचारांची माणसे बसवली आहेत.जेव्हा विज्ञानाची जागा धर्मांधता घेते तेव्हा हेच घडते व वेगळ्या प्रकारची फॅसिस्ट राजवट सुरू होते.मोदींमुळे मुलींची उंची वाढली हा विचार त्याच राजवटीतून निर्माण झाला.नेहरूंनी देशाला विज्ञान व संशोधनात उंच नेऊन ठेवले त्या उंचीवरून देश खाली घसरताना दिसत आहे! असे टीकास्त्रही ठाकरे गटाकडून सोडण्यात आले आहे.