शेतकऱ्यांचा निर्णय घेऊनच मुख्यमंत्र्यांनी आषाढीच्या पूजेला यावे अन्यथा ठाकरे गटातर्फे आंदोलन

सोलापूर-पोलीस नायक (वृत्तसेवा) :-

गाईच्या दुधाला ४० रूपये आणि म्हशीच्या दुधाला ६० रुपये प्रतिलिटर खरेदीदर मिळावा तसेच दुधाचे धोरण ठरवावे,शेतकऱ्यांच्या हिताचा निर्णय घेऊनच मुख्यमंत्री एकनाथ शिंदे यांनी पंढरपूरला आषाढी पूजेला यावे अन्यथा उध्दव बाळासाहेब ठाकरे शिवसेनेकडून विधान भवनावर मोर्चा काढण्याचा इशारा पक्षाचे प्रवक्ते लक्ष्मण हाके यांनी दिला आहे.सोलापुरात एका पत्रकार परिषदेत बोलताना हाके म्हणाले की,करोना महामारी,टाळेबंदी आणि लम्पी रोगाच्या साथीनंतर दूध व्यवसाय उभारी घेत असतांना राज्यातील दूध संघांनी दुधाचे दर अचानक कमी केले. एका बाजूला पशुखाद्य,पशु वैद्यकीय सेवांचे दर दुप्पट होत असतांना आणि प्रतिलिटर दुधाचा भाव वाढण्याऐवजी दूध संघानी कमी का केला याचे उत्तर राज्य शासनाने आणि दूध संघानी देणे आवश्यक आहे.दुधाची मागणी वाढलेली असतांना दुधाचे दर कमी करुन दूधसंघ नफेखोरी करीत आहेत का? हा प्रश्न शेतकरी जनतेला पडला आहे असे हाके यांनी म्हटले आहे.