समृद्धी महामार्गाचा प्रवास सुरक्षित होण्यासाठी तज्ज्ञांमार्फत अभ्यास करण्यात येईल-मुख्यमंत्री एकनाथ शिंदे यांची ग्वाही

बुलढाणा-पोलीस नायक (वृत्तसेवा) :-

समृद्धी महामार्गाचा प्रवास सुरक्षित होण्यासाठी तज्ज्ञांमार्फत अभ्यास करण्यात येईल व त्यांच्या सूचनांनुसार उपाययोजना प्राधान्याने अंमलात आणण्यात येतील अशी ग्वाही मुख्यमंत्री एकनाथ शिंदे यांनी आज दिली आहे.समृद्धी महामार्गावरील खाजगी प्रवासी बसचा अपघात रात्री दोन वाजता झाला होता व या अपघातस्थळाला आज मुख्यमंत्री शिंदे यांनी उपमुख्यमंत्री देवेंद्र फडणवीस यांच्यासमवेत भेट दिली.यावेळी त्यांच्यासमवेत मंत्री गिरीश महाजन,संदिपान भुमरे,पालकमंत्री गुलाबराव पाटील,खासदार प्रतापराव जाधव,आमदार संजय रायमुलकर, आकाश फुंडकर,श्वेता महाले,विभागीय आयुक्त निधी पांडेय,विशेष पोलीस महानिरीक्षक जयंत नाईकनवरे,जिल्हाधिकारी डॉ.एच.पी.तुम्मोड, पोलीस अधीक्षक सुनील कडासने आदी उपस्थित होते.

यावेळी मुख्यमंत्री एकनाथ शिंदे म्हणाले की,समृद्धी मार्गावरील अपघात हा दुर्दैवी असून समृद्धी महामार्गावरील अपघात अतिवेग आणि वाहनचालकांना झोपेची डुलकी आदी कारणामुळे घडत आहेत.याप्रकारचे अपघात भविष्यात घडू नये यासाठी काळजी घेणे गरजेचे आहे. अपघात रोखण्यासाठी ज्या उपायोजना करणे गरजेचे आहे त्या शासन स्तरावरून गांभीर्यपूर्वक व प्राधान्याने करण्यात येतील.अपघाताच्या पार्श्वभूमीवर स्थानिक यंत्रणा अपघातस्थळी पोहोचली मात्र बसचा मुख्य दरवाजा बंद असल्यामुळे प्रवाशांना बाहेर येता आले नाही त्यामुळे मृतांच्या संख्येत वाढ झाली आहे.खाजगी प्रवासी वाहतुकीमध्ये जादा प्रवासी वाहतूक करणाऱ्यांविरुद्ध कठोर कारवाई करण्यात येईल.समृद्धी महामार्गावर येणारी वाहतूक नियंत्रित करण्यासाठी यंत्रणा कार्यान्वित आहे.महामार्गावर प्रवेश देण्याआधी वाहनांची तपासणी केली जाते तसेच चालकांचे समुपदेशन केले जाते व वाहन किंवा वाहनचालक योग्य पात्रतेचे नसल्यास त्यांना परत पाठवले जाते यामुळे प्रवाशांची आणि वाहनचालकांची नाराजी होते मात्र सुरक्षिततेच्या दृष्टिकोनातून नियमांचे काटेकोर पालन करून वाहतूक नियंत्रण केले जात आहे असे मुख्यमंत्री एकनाथ शिंदे यांनी म्हटले आहे.