“देशाचे सध्याचे राजकारण म्हणजे अडाण्यांचा गाडा” ठाकरे गटाचा सामनातून प्रहार

मुंबई-पोलीस नायक (वृत्तसेवा) :-

११ जुलै २३ मंगळवार

बॉलिवूड अभिनेत्री काजोलने काही दिवसांपूर्वी देश चालवणाऱ्या अनेक नेत्यांकडे दूरदृष्टीचा अभाव आहे व शिक्षणामुळेच तुमच्यात दूरदृष्टी येते असे भाष्य केले होते या प्रकरणावरून ठाकरे गटाने केंद्र सरकारवर आणि भाजपा समर्थकांवर टीका केली आहे.देशाचे सध्याचे राजकारण म्हणजे अडाण्यांचा गाडा झाला आहे व त्यावरच अभिनेत्री काजोलने आपले परखड मत व्यक्त केले.शैक्षणिक पार्श्वभूमी नसलेले राजकारणी देश चालवत आहेत असे काजोलने म्हटले आहे.देशात वैचारिक बदलांची प्रक्रिया खूपच संथगतीने सुरू आहे कारण शैक्षणिक पार्श्वभूमी नसलेले राजकारणी देश चालवत आहेत असे काजोलने सांगितले.काजोलचे मत हे अनेकांच्या डोळ्यांत अंजन घालणारे आहे असे ठाकरे गटाने त्यांचे मुखपत्र असलेल्या सामनाच्या अग्रलेखात म्हटले आहे.काजोल महाराष्ट्रकन्या असल्याने परखडपणा तिच्या स्वभावात असणारच.पुन्हा शिक्षणासंदर्भात विचार देणारे महात्मा फुले याच मातीतले.महात्मा फुले यांनी शिक्षणाचा पुरस्कार केला.ते सांगतात विद्येविना मती गेली, मतीविना नीती गेली,नीतीविना गती गेली,गतीविना वित्त गेले,वित्तविना शूद्र खचले इतके अनर्थ एका अविद्येने केले!महात्मा जोतिराव फुले व सावित्रीबाई फुले यांनी लोकांना शहाणे व शिक्षित करण्यासाठी शर्थ केली त्याच सावित्रीची लेक काजोल शिक्षणाची महती सांगत आहे. काजोलने शिक्षणाचे महत्त्व सांगितले ते नेमके कुणाला व का झोंबले? तिने तर कुणाचेच नाव घेतले नव्हते असा सवाल ठाकरे गटाने उपस्थित केला आहे.देशातील विकास,शिक्षण,लोकशाही यावर तिला मत व्यक्त करण्याचा अधिकार नाही काय?

डॉ.बाबासाहेब आंबेडकरांनी सांगितले आहे “शिका संघटीत व्हा व संघर्ष करा” अज्ञान हे घातक असते व अज्ञानातून अंधश्रद्धा व अंधभक्तांची पैदास वाढते.भारत देश सध्या या अंधारातून प्रवास करीत आहे.अंधभक्तांना काजोलचे वक्तव्य झोंबले कारण त्यांच्यासमोर त्यांचे विश्वगुरू पंतप्रधान मोदींचे चित्र व चरित्र आहे.पंतप्रधान मोदी हे गुजरातमधील एका प्लॅटफॉर्मवर चहा विकत होते पण ते ज्या गावात चहा विकत होते असे सांगतात त्या गावात तेव्हा रेल्वेही नव्हती तर प्लॅटफॉर्म तरी कसा असेल? प्रश्न चहा विकणारा पंतप्रधान झाला हा नाही तर पंतप्रधान त्यांची शैक्षणिक अर्हता लपवीत आहेत आपण उच्चविद्याविभूषित आहोत हे दाखविण्यासाठी मोदी यांच्या वतीने गृहमंत्री अमित शहा यांनी एक बनावट ‘डिग्री सर्टिफिकेट’ जाहीर केले.पंतप्रधानांना शेवटी त्यांची डिग्री लपवून ठेवावी लागली व सर्वत्र त्यांचे हसे झाले असा प्रहारही सामनातून करण्यात आला आहे.करोना काळात पंतप्रधान मोदी यांनी ‘थाळ्या व घंटा’ वाजवून करोना पळवून लावण्याचे आवाहन केले.कोणतीही पूर्वकल्पना न देता नोटाबंदी जाहीर केली व लोकांना रांगेत उभे करून मारले हे शैक्षणिक पार्श्वभूमी नसल्याचेच ‘झटके’ आहेत.पंतप्रधान मोदींचे सहकारी तर त्यांच्यापेक्षा वरचढ आहेत.हिंदूंनी चार पोरांना जन्म द्यावा लोकसंख्या वाढवावी असे मोदींचे मंत्री सांगतात चार पोरांपैकी दोन ‘संघा’ला द्या असेही सांगतात हे सभ्य व सुसंस्कृतपणाचे लक्षण नाही अशी टीकाही ठाकरे गटाने केली आहे.