“मंत्रीमंडळ विस्तार होईल तेव्हा एकनाथ शिंदे योग्य तो निर्णय घेतील”,एकनाथ शिंदे जो निर्णय घेतील तो आमच्या सगळ्यांच्या दृष्टीने व महाराष्ट्राच्या हिताचा असेल

राज्यात गेल्या काही दिवसांपासून पुन्हा एकदा मंत्रीमंडळ विस्ताराची चर्चा रंगू लागली असून एकीकडे शिंदे गट व भाजपा युतीच्या सरकारचा मंत्रीमंडळ विस्तार प्रलंबित असतानाच अजित पवार गटाचा सरकारमध्ये प्रवेश झाला.पहिल्याच दिवशी अजित पवार गटातील ९ आमदारांनी मंत्रीपदाची शपथ घेतली त्यामुळे शिंदे गटातील व भाजपातील इच्छुक मोठ्या प्रमाणावर नाराज असल्याचे बोलले जात आहे त्यात नव्या मंत्र्यांना खातेवाटप झालेले नाही.सरकारमध्ये सहभागी असणारे बच्चू कडू यांनी मंत्रीमंडळ विस्ताराबाबत जाहीर नाराजी व्यक्त केली असून त्यावर आता उद्योग मंत्री उदय सामंत यांनी सूचक विधान केले आहे.उदय सामंत सध्या विदर्भात असून त्यांना माध्यम प्रतिनिधींनी मंत्रीमंडळ विस्तार, खातेवाटप व बच्चू कडूंच्या नाराजीबाबत प्रश्न विचारले यावेळी उदय सामंत यांनी सरकारमधील सहभागी अनेकांना अद्याप न्याय मिळाला नसल्याचे विधान केले आहे.बच्चू कडूंनी आत्तापर्यंत सहकार्य केले असून बच्चू कडू माझे ज्येष्ठ सहकारी आहेत.आमच्या सरकारबरोबर त्यांचे प्रहार युतीत आहे त्यांच्याबरोबर आमचे अपक्ष राजेंद्र यड्रावकर मंत्री होते त्यांनाही न्याय मिळालेला नाही तसेच अन्यही अनेकांना न्याय मिळालेला नाही.आमच्या ४० आमदारांपैकीही इच्छुकांना न्याय मिळालेला नाही.बच्चू कडूंचा गैरसमज होणार नाही याची मला पूर्ण खात्री आहे. ज्यावेळी मंत्रीमंडळ विस्तार होईल तेव्हा एकनाथ शिंदे योग्य तो निर्णय घेतील असे उदय सामंत म्हणाले.