“मोदी सरकारच्या कार्यपद्धतीवर आणि मणिपूर घटनेच्या अयोग्य हाताळणीवर भाजपा नेते व बिहारमधील पक्षाचे प्रवक्ते विनोद शर्मा यांचा पक्षाच्या सर्व पदांचा राजीनामा!!”

संसदेच्या पावसाळी अधिवेशनाच्या पार्श्वभूमीवर देशभरातच राजकीय वातावरण तापल्याचे पाहायला मिळत असून विरोधी पक्षांच्या INDIA या आघाडीने संसदेत सत्ताधारी एनडीए व विशेषत: भाजपाविरोधात विविध मुद्द्यांवर आक्रमक भूमिका घेतली आहे.काल दि.२७ जुलै गुरुवार रोजी विरोधी पक्षांचे खासदार सरकारचा निषेध करण्यासाठी चक्क काळे कपडे घालून संसदेच्या कामकाजात सहभागी झाले होते या पार्श्वभूमीवर आता भाजपाच्याच एका नेत्याने थेट पंतप्रधान नरेंद्र मोदींवर टीका करत पक्षाच्या सर्व पदांचा राजीनामा दिला असून राजकीय वर्तुळात खळबळ उडवून दिली आहे.मणिपूरमध्ये ४ मे रोजी घडलेल्या एका विक्षिप्त घटनेचा व्हिडीओ गेल्या आठवड्यात देशभर व्हायरल झाला त्यात दोन महिलांची नग्न धिंड काढल्याच्या या व्हिडीओमुळे देशभरात संतापाची लाट उसळली असून पंतप्रधान नरेंद्र मोदींनी घटनेच्या दोन महिन्यांनंतर संसदेत न बोलता फक्त माध्यमांसमोर त्यांनी भूमिका मांडल्यामुळे विरोधकांनी हा मुद्दा अधिवेशनात लावून धरला आहे. मणिपूरमध्ये अंतर्गत सामाजिक असंतोषामुळे गेल्या तीन महिन्यांपासून जनजीवन विस्कळीत झाले असून या पार्श्वभूमीवर देशभरातून विरोधकांनी मोदी सरकारवर प्रश्नचिन्ह उपस्थित केले असतांनाच खुद्द भाजपाच्या एका नेत्याने मोदी सरकारच्या कार्यपद्धतीवर आणि मणिपूर घटनेच्या अयोग्य हाताळणीवर संतप्त प्रतिक्रिया दिली आहे तसेच पक्षाच्या सर्व पदांचा राजीनामाही दिला आहे.