“आमदार अपात्रतेचा निकाल लवकर लागू नये म्हणून योजना तयार केल्या जात आहेत”-कायदेतज्ज्ञ असीम सरोदे यांचा आरोप

शिवसेनेत बंडखोरी केलेल्या आमदारांची सुनावणी लवकरच विधानसभा अध्यक्ष राहुल नार्वेकर घेणार असून ५६ दिवस ५६ आमदारांची बाजू राहुल नार्वेकर ऐकणार आहेत व त्यानंतर राहुल नार्वेकर आपला निर्णय जाहीर करू शकतात.परंतु कायदेतज्ज्ञ असीम सरोदे यांनी राहुल नार्वेकर वेळकाढूपणा करत असल्याचा आरोप केला आहे.आमदार अपात्रतेचा निकाल लवकर लागू नये म्हणून योजना तयार केल्या जात आहेत असे असीम सरोदे यांनी ‘टीव्ही ९ मराठी’शी बोलतांना म्हटले आहे.असीम सरोदे म्हणाले,सर्वोच्च न्यायालयाने एकनाथ शिंदे यांच्या प्रकरणी १४१ पानांचा निकाल दिला होता त्यात परिच्छेद ११० आणि १११ मध्ये रिझनेबल टाईममध्ये ( ठराविक वेळेत ) याप्रकरणाचा निर्णय घ्यावा असे म्हटले आहे पण रिझनेबल टाईम किती दिवस? किती वेळ? असे सांगितले नाही त्याचा गैरफायदा घेतला जात आहे ही संवैधानिक अनैतिकता आहे तसेच मणिपूरमधील के.मेघचंद्र विरुद्ध विधानसभा अध्यक्ष आणि राजेंद्र सिंह राणा प्रकरणात न्यायालयाने स्पष्ट केले आहे की,सामान्य परिस्थिती असेल तर ३ महिन्यांत निकाल दिला पाहिजे.गुंतागुंतीची परिस्थिती असेल तर ३ महिने आणि सामान्य परिस्थिती असेल तर ३ महिन्यांमध्ये निकाल लागला पाहिजे मात्र १६ आमदारांच्या संदर्भात कोणतीही गुंतागुंतीची परिस्थिती नाही असे असीम सरोदे यांनी सांगितले आहे.