सांगलीतील निर्धार फौंडेशनतर्फे शहरातील सार्वजनिक ठिकाणांची सलग ७६ तास स्वच्छता मोहीम

सांगली-पोलीस नायक (वृत्तसेवा) :-

दि.१४ ऑगस्ट २३ सोमवार

भारतीय स्वातंत्र्यदिनाच्या ७६ व्या वर्धापन दिनाचे औचित्य साधून सांगलीतील निर्धार फौंडेशनच्या तरूणांनी शहरातील सार्वजनिक ठिकाणांची सलग ७६ तास स्वच्छता मोहीम सुरू केली आहे.दरम्यान सलगपणे तीन दिवस व तीन रात्री चालणार्‍या या स्वच्छता मोहिमेला सांगलीतील हुतात्मा स्मारकापासून सुरूवात करण्यात आली आहे.बसस्थानक,पोलीस ठाणे,रस्त्यावरील दुभाजके,महापुरूषांचे पुतळे आदींची या मोहिमेमध्ये स्वच्छता व रंगरंगोटी करण्यात येत आहे.स्वच्छतेचा नारा देत गेली १ हजार ९२९ दिवस अव्याहतपणे काम करणार्‍या निर्धार फौंडेशनचे अध्यक्ष राकेश दड्डणावर आणि त्यांच्या सहकार्‍यांकडून ही मोहिम हाती घेण्यात आली आहे.हुतात्मा स्मारक येथे महापालिकेचे उपायुक्त राहूल रोकडे यांच्या प्रमुख उपस्थितीत या मोेहिमेचा शनिवारी शुभारंभ करण्यात आला.