“राममंदिर फक्त ‘व्हीव्हीआयपी’ म्हणजे अति विशिष्ट लोकांसाठी खुले राहील त्यांनाच आमंत्रित केले जाईल असे सांगणारे हे रावणाचे व विभीषणाचे वंशज असावेत”

महाराष्ट्रात शेतकरी,बेरोजगार रोज आत्महत्या करीत आहेत व बहुदा या महान कामगिरीबद्दलच उपमुख्यमंत्री देवेंद्रभाऊ फडणवीस यांना ‘डॉक्टरेट’ उपाधी देऊन सन्मानित करण्यात येत आहे.जपानमधील एका विद्यापीठाने सामाजिक समानतेसाठी केलेल्या कार्याबद्दल त्यांना ही ‘डॉक्टरेट’ दिल्याचे समजते.राज्यात सामाजिक समतेचे व पुरोगामी विचाराचे वाभाडे निघाले आहेत.सध्या मराठा,ओबीसी व इतर समाजातील भांडणे विकोपाला जाऊन परिस्थिती हाताबाहेर गेली आहे त्यामागे कोणाचे डोके व खोके आहेत ते महाराष्ट्र जाणतो.आता देवेंद्र फडणवीस यांच्यामागे ‘डॉ.’ अशी उपाधी लागेल.मुख्यमंत्री मिंधे यांनाही मधल्या काळात कुणा संस्थेने सामाजिक कार्याबद्दल ‘डॉ.’ पदवी दिली पण विद्यमान सरकारच्या काळात महाराष्ट्रात तीन हजारांवर शेतकऱ्यांच्या नावापुढे ‘के.’, ‘स्व.’ अशा उपाध्या लागल्या असेही ठाकरे गटाने म्हटले  आहे.डॉ.फडणवीस वगैरे लोक पिचक्या मांडीवर थाप मारून सांगत आहेत की,राममंदिराच्या लढ्यात शिवसेनेचे योगदान काय? हिंमत असेल तर अयोध्येत या तुमच्या छाताडावर मंदिर उभे केले आहे.राम म्हणजे संयम,राम म्हणजे सुस्वभाव पण या लोकांनी संयमाची ऐशीतैशीच करून टाकली असून जे लोक अयोध्येचा लढा सुरू असतांना शिवसैनिक बाबरीवर निर्णायक घाव घालत असतांना मैदान सोडून पळून गेले ते रणछोडदास आता ‘हिंमत दाखवा’ वगैरे आव आणतात तेव्हा आश्चर्य वाटते.राममंदिर तुमची खासगी संपत्ती आहे काय?असा प्रश्न विचारताच फडणवीस वगैरे लोकांना ‘मिरची’ लागायचे कारण नव्हते पण प्रश्न खरा व झणझणीत असल्याने त्यांना झोंबला.प्रभू श्रीरामाचे बोट धरून विष्णूचे तेरावे (भाजपा कृत) अवतार मोदी हे राममंदिरात निघाले आहेत अशी पोस्टरबाजी हिंदूंना मान्य नाही.मोदी हे रामापेक्षा मोठे झाले काय? असे पोस्टर दुसऱ्या कोणी छापले असते तर ‘हिंदुत्वाचा अपमान झाला होss’ अशा आरोळ्या ठोकत भाजपाने रस्त्यांवर घंटानाद व थाळीवादन केले असते पण राममंदिरात मोदी निघाले आहेत व रामाने त्यांचे बोट धरले आहे हे चित्र भाजपास अस्वस्थ करीत नाही अशी टीका ठाकरे गटाने केली आहे.

राममंदिराच्या लढ्यानंतर मुंबईत भडकलेल्या दंगलीत हिंदूंचे रक्षण करणाऱ्या शिवसेनेचे राममंदिरात योगदान काय? असे विचारणारी अवलाद शुद्ध हिंदू असू शकत नाही.बाबरीचे घुमट कोसळत असतांना जे पलायनवादी झाले तेच आज हिंदुत्ववादी म्हणून मिरवत आहेत व हे ढोंग पाहून गंगा,यमुना,गोदावरी,शरयूचे पात्रही स्तब्ध झाले आहे.राममंदिर उभे राहात आहे हे आनंदाचे गाणे आहे व संपूर्ण देश ते गाणे गात आहे.राम अहंकारी नव्हता पण मंदिर उ‌द्घाटन करणारे अहंकारी व ढोंगी आहेत.श्रीरामाने पिताश्री दशरथाचा सन्मान राखला व वनवास पत्करला.इथे पिताश्री आडवाणी यांनाच वनवासी करून अयोध्येचा सात- बारा आपल्या नावावर करून घेतला जात आहे.असंख्य जुमलेबाजीच्या इतिहासात हे आणखी एक पान जोडले जात आहे.प्रभू श्रीराम हे सामान्यांचे,सत्याची कास धरणाऱ्यांचे दैवत असून त्या दैवतासाठी लढा झाला पण आता भाजपाने जाहीर केले आहे की,राममंदिर फक्त ‘व्हीव्हीआयपी’ म्हणजे अति विशिष्ट लोकांसाठी खुले राहील त्यांनाच आमंत्रित केले जाईल असे सांगणारे हे रावणाचे व विभीषणाचे वंशज असावेत असा हल्लाबोलही ठाकरे गटाने भाजपावर केला आहे.