“महाराष्ट्रात अशी गुन्हेगारी बंद करायची असेल तर एकनाथ शिंदेंचा राजीनामा घेतला पाहिजे”,आमदार गणपत गायकवाड यांचा आरोप

गणपत गायकवाड म्हणाले,मी वरिष्ठांना अनेकदा तक्रार केली होती.माझा निधी वापरुन काम झाले की श्रीकांत शिंदे हे स्वतः ते काम केल्याचे बोर्ड लावतात.दादागिरी करुन हे होत आहे.मी राज्य शासनाचा निधी आणला आणि कामे केली तिथे श्रीकांत शिंदेंनी त्यांची कामे म्हणून बोर्ड लावले.माझ्यावर भ्रष्टाचाराचे आरोप केले.एकनाथ शिंदे यांनी त्या भ्रष्टाचारात किती पैसे खाल्ले ते सांगावे.मी दहा वर्षांपूर्वी जागा घेतली होती. त्यांना पैसेही दिले होते पण ते सही करायला येत नव्हते त्यामुळे आम्ही कोर्टात गेलो.कोर्टात केस जिंकलो.केस जिंकल्यावर सातबारा आमच्या नावे झाला मात्र महेश गायकवाड यांनी त्या जागेवर जबरदस्ती कब्जा केला.मी त्यांना विनंती केली होती की तुम्ही कोर्टात जा,जबरदस्ती कब्जा घेऊ नका.कोर्टाने ऑर्डर दिली तर आम्ही जागा देऊ मात्र त्यांनी दादागिरी काही थांबवली नाही.पोलीस स्टेशनच्या आवारात तो ५०० लोक घेऊन आला होता.माझ्या मुलाला धक्काबुक्की झाली त्यामुळे गोळीबार केला.मी एक व्यावसायिक आहे माझ्या मुलांना कुणी गुन्हेगार मारत असतील तर मी काय करणार? माझ्या मुलाला कुणी मारले तर मी सहन करणार नाही.एकनाथ शिंदेंनी उद्धव ठाकरेंशी गद्दारी केली आणि भाजपाबरोबरही ते गद्दारी करणार आहेत.माझ्याबरोबरही गद्दारीच केली.एकनाथ शिंदेंकडे माझे कोट्यवधी रुपये आहेत.एकनाथ शिंदे हे देवाला मानत असतील तर त्यांनी सांगावे किती पैसे खाल्ले आहेत,किती बाकी आहेत.कोर्ट निर्णय देईल तो मला मान्य असेल पण महाराष्ट्रात अशी गुन्हेगारी बंद करायची असेल तर एकनाथ शिंदेंचा राजीनामा घेतला पाहिजे हे माझे वैयक्तिक मत आहे.एकनाथ शिंदेंनी महाराष्ट्रात गुन्हेगारी वाढवली आहे आणि महाराष्ट्राची वाट लावली आहे.महाराष्ट्र चांगला ठेवायचा असेल तर एकनाथ शिंदेंचा राजीनामा घेतला पाहिजे. अशी माझी विनंती देवेंद्र फडणवीस आणि पंतप्रधान नरेंद्र मोदींनाही आहे असेही गणपत गायकवाड म्हणाले.