पुढील दोन ते तीन दिवसात जळगाव सह राज्यात हलका ते मध्यम स्वरुपाच्या पावसाची शक्यता

यात अमरावती जिल्ह्यातील धामणगाव तालुक्यात शनिवारी काही भागांमध्ये सायंकाळी मुसळधार पावसासह गारपीट झाल्याने शेतकरी संकटात सापडले आहेत.हवामान खात्याने वर्तवलेल्या अंदाजाप्रमाणे शनिवारी धामणगाव तालुक्यातील तळेगाव,देवगाव,जळका पटाचे, आसेगाव तसेच यवतमाळ मार्गावरील सर्व परिसरात पावसासह गारपीट झाली.अर्धा तास झालेल्या गारपिटीने या भागातील हरभरा.तूर व गहू पिकाचे मोठ्या प्रमाणात नुकसान झाले आहे तसेच विद्युत पुरवठा सुद्धा बंद झाला होता.या भागातील अनेक तूर आणि हरभरा काढण्याचे काम गतीने चालू होते तसेच गहू सुद्धा शेवटला टप्प्यात होता परंतु ऐन तोंडावर आलेला घास हिसकावून घेतल्याची परिस्थिती या परिसरातील शेतकऱ्यांवर उद्भवली आहे.नुकसान झालेल्या शेतकऱ्यांचा शेताचा त्वरित पंचनामा करून त्यांना आर्थिक मदत देण्यात यावी अशी मागणी करण्यात आली आहे.वर्धा जिल्ह्यातील देवळी तालुक्यात सुद्धा गारपीट झाली.मौजा भिडी विजयगोपल येथे वादळी वाऱ्यासोबत जोरदार पाऊस व गारपीट झाली.चना,तुरी,गहु या पिकांचे प्रचंड नुकसान झाले.चंद्रपूर शहरात व ग्रामीण भागात वादळ वारा व रिमझिम पावसाने हजेरी लावली.शनिवारी विदर्भातील अमरावती,यवतमाळ,वर्धा,नागपूर परिसरात हा पाऊस झाला.वर्धा जिल्ह्यातील देवळी शनिवारी दुपारी तुफान गारपीट झाली.काही भागात वीज पुरवठा सुद्धा खंडित झाल्याने शेतकऱ्यांची तारांबळ उडाली.शेतकऱ्यांच्या शेतातील पिकांचे अतोनात नुकसान झाले.दरम्यान पुढील दोन ते तीन दिवस राज्यात हलका ते मध्यम स्वरुपाचा पाऊस होईल असा अंदाज हवामान खात्याने वर्तवला आहे यात मराठवाडा,जळगाव,सांगली,सोलापूर,छत्रपती संभाजीनगर,बीड,नांदेड,लातूर या भागात हलक्या स्वरूपाचा पाऊस होण्याची शक्यता आहे याशिवाय विदर्भातील अकोला,अमरावती,वर्धा तसेच नागपुरात वादळी वाऱ्यासह जोरदार पाऊस होईल असेही हवामान खात्याने सांगितले आहे.