“आता मला वाटते की मी अन्य पर्याय पाहिले पाहिजेत म्हणून राजीनामा दिला आहे व काँग्रेस सोडणे हा माझा वैयक्तिक निर्णय आहे”-अशोक चव्हाण यांची राजीनाम्यावर प्रतिक्रिया

यावेळी प्रसारमाध्यमांच्या प्रतिनिधींनी चव्हाण यांना विचारले की, असे काय घडले की तुम्ही राजीनामा देण्याचा निर्णय घेतला? पक्ष सोडण्याचा निर्णय कधी पक्का केला? यावर अशोक चव्हाण म्हणाले,प्रत्येक गोष्टीला काही कारण असलेच पाहिजे असे काही नाही तसेच प्रत्येक कारण सर्वांना सांगितलेच पाहिजे असेही काही नाही.सगळ्याच गोष्टी जाहीर केल्या जात नाहीत.मी कधीही माझ्या पक्षांतर्गत बाबी लोकांसमोर, माध्यमांसमोर मांडल्या नाहीत तसेच पक्षात काही उणीदुणी असतील तर मी ती कधीही चव्हाट्यावर मांडली नाहीत.पक्ष सोडण्याच्या निर्णयाबाबत अशोक चव्हाण म्हणाले,मी सुरुवातीपासून काँग्रेसमध्ये आहे.आता मला वाटते की मी अन्य पर्याय पाहिले पाहिजेत म्हणून राजीनामा दिला आहे व काँग्रेस सोडने हा माझा वैयक्तिक निर्णय आहे.दरम्यान यावेळी माजी मुख्यमंत्र्यांना प्रश्न विचारण्यात आले की,तुम्ही भाजपात जाणार का? भाजपा तुम्हाला राज्यसभेवर पाठवणार असल्याची चर्चेत किती तथ्य आहे? यावर अशोक चव्हाण म्हणाले,मला भाजपाची कार्यप्रणाली माहिती नाही.मी अद्याप भाजपात जाण्याचा किंवा इतर कुठल्याही पक्षात जाण्याचा निर्णय घेतला नाही.येत्या एक ते दोन दिवसांत मी माझी पुढची राजकीय दिशा जाहीर करेन असेही अशोक चव्हाण यांनी म्हटले आहे.