“आज त्यांनी राजीनामा दिला असेल आणि जर ते भाजपात गेले तर याचा अर्थ त्यांचा आदर्श घोटाळा भाजपाला पवित्र करुन घ्यायचा आहे”

महाराष्ट्राचे माजी मुख्यमंत्री आणि राज्यातील ज्येष्ठ नेते अशोक चव्हाण यांनी काँग्रेसच्या प्राथमिक सदस्यत्वाचा आणि आमदारकीचा (विधानसभा सदस्यत्व) राजीनामा दिला आहे.या राजीनाम्यांनंतर अशोक चव्हाण भाजपात जाणार असल्याची चर्चा राजकीय वर्तुळात चालू आहे तसेच काही वृत्तवाहिन्यांनी दावा केला आहे की,अशोक चव्हाण हे १५ फेब्रुवारी रोजी केंद्रीय गृहमंत्री अमित शाह यांच्या उपस्थितीत भाजपात प्रवेश करतील तसेच भाजपा अशोक चव्हाण यांना राज्यसभेवर पाठवणार असल्याची शक्यता वर्तवली जात आहे.अशोक चव्हाण यांच्याबाबत वेगवेगळ्या राजकीय चर्चांना उधाण आलेले असतांना चव्हाण यांनी स्वतः प्रसारमाध्यमांसमोर येत या सर्व अफवांचे खंडण केले आहे तसेच पक्ष सोडण्याबाबत स्पष्टीकरण दिले आहे.अशोक चव्हाण म्हणाले,प्रत्येक गोष्टीला काही कारण असलेच पाहिजे असे काही नाही तसेच प्रत्येक कारण सर्वांना सांगितलेच पाहिजे असेही काही नाही.सगळ्याच गोष्टी जाहीर केल्या जात नाहीत.मी कधीही माझ्या पक्षांतर्गत बाबी लोकांसमोर, माध्यमांसमोर मांडल्या नाहीत तसेच पक्षात काही उणीदुणी असतील तर मी ती कधीही चव्हाट्यावर मांडली नाहीत.पक्ष सोडण्याच्या निर्णयाबाबत अशोक चव्हाण म्हणाले,मी सुरुवातीपासून काँग्रेसमध्ये आहे.आता मला वाटते की मी अन्य पर्याय पाहिले पाहिजेत म्हणून राजीनामा दिला आहे.काँग्रेस सोडणे हा माझा वैयक्तिक निर्णय आहे असे अशोक चव्हाण यांनी म्हटले आहे.