“महाराष्ट्र दिल्लीशाहीची जी हुकूमशाही सुरु आहे त्याविरोधात तडफेने उभा”-उद्धव ठाकरे यांची टीका

कन्नड-पोलीस नायक (वृत्तसेवा) :-

दि.१३ फेब्रुवारी २४ मंगळवार

अशोक चव्हाण यांनी काँग्रेस सदस्यत्वाचा राजीनामा १२ फेब्रुवारीला दिला असून महाराष्ट्रात काँग्रेससाठी हा सर्वात मोठा धक्का मानला जात आहे.अशोक चव्हाण १५ फेब्रुवारीला भाजपात प्रवेश करतील आणि त्यांना भाजपाकडून राज्यसभेवर पाठवण्यात येईल अशी शक्यता वर्तवली जाते आहे तर अशोक चव्हाण यांनी स्वतः भाजपात जाण्याबाबत काहीही सांगितलेले नाही.मला भाजपाची कार्यप्रणाली माहीत नाही त्यामुळे मी माझी भूमिका दोन दिवसांत स्पष्ट करेन इतकेच विधान त्यांनी केले आहे.या सगळ्या घडामोडी घडतांना कन्नडच्या सभेत उद्धव ठाकरे यांनी अशोक चव्हाण आणि देवेंद्र फडणवीस यांच्यावर टीका केली आहे.अशोक चव्हाण इतक्या लवकर तिकडे जातील असे वाटले नव्हते.काल-परवा पर्यंत नीट बोलत होते त्यामुळे असेच वाटणार ते तिकडे गेले पण कपाळावर शिक्का काय लागणार? गद्दार! मग आयुष्याची कमाई काय? इतके सगळे मिळवलेत पण गद्दारीत सगळे गमावले आहे.अशोकराव तुम्ही तिकडे गेलात म्हणून तुमच्यावर लगेच आरोप करणार नाही पण तुम्ही घोडचूक केली आहे जी तुम्हाला आणि तुमच्या पुढच्या पिढ्यांना भोगावी लागणार आहे.महाराष्ट्र दिल्लीशाहीची जी हुकूमशाही सुरु आहे त्याविरोधात तडफेने उभा आहे.हिंदू आमच्याबरोबर आहेत पण मुस्लिम बांधवही आहेत हे सगळे का येत आहात? माझा पक्ष चोरला,चिन्ह गद्दारांना दिले आहे.माझे हात रिकामे आहेत.तरीही इतकी गर्दी होते आहे ही माझी संपत्ती आहे त्यांच्याकडे भेकडांची सेना आणि गद्दारांची सेना आहे पण तुमची भाड्याची फौज आमच्या मर्दांशी टक्कर देऊ शकत नाही.