“उद्धव ठाकरेंना शिवसेना हे नाव आणि धनुष्यबाण पक्षचिन्ह परत मिळेल ? असीम सरोदे यांचा दावा

मुंबई-पोलीस नायक (वृत्तसेवा) :-

दि.२० फेब्रुवारी २४ मंगळवार

राहुल नार्वेकरांनी शिवसेनेबाबत आणि राष्ट्रवादी काँग्रेसबाबत जो निर्णय दिला तो चुकीचा असून आम्हाला सर्वोच्च न्यायालयात न्याय मिळेल आणि उद्धव ठाकरेंना शिवसेना हे पक्षनाव तसेच धनुष्यबाण हे चिन्ह परत मिळेल असा दावा असीम सरोदे यांनी केला आहे.तसेच मराठा आरक्षण प्रकरणी मनोज जरांगे पाटील यांच्या डोळ्यांत धूळफेक केली गेली आहे असेही असीम सरोदे यांनी म्हटले आहे.शिवसेना हे नाव आणि धनुष्यबाण हे चिन्ह एकनाथ शिंदेंना देऊन राहुल नार्वेकरांनी खूप मोठी चूक केली आहे.सर्वोच्च न्यायालयाने दिलेल्या निर्णयाचा तो अपमान आहे.सर्वोच्च न्यायालयाने जो निर्णय घेतला त्यात दोन गोष्टी होत्या.भरत गोगावलेंना व्हिप म्हणून मान्यता देणे बेकायदेशीर आहे असे म्हटले होते तसेच एकनाथ शिंदेंना गटनेता म्हणून मान्यता देणेही बेकायदेशीर असल्याचे सांगितले होते.सगळ्यात महत्त्वाची बाब म्हणजे १० व्या सूचीनुसार पक्षांतर बंदीचे प्रकरण असल्याने राहुल नार्वेकरांनी शेवटचा निकाल द्यावा म्हणून त्यांच्याकडे पाठवण्यात आले होते.सरन्यायाधीशांसह पाच न्यायाधीशांच्या खंडपीठाने हे म्हटले होते की,अध्यक्षांनी निर्णय द्यायचा आहे कारण हे पक्षांतर बंदी कायद्याचे प्रकरण आहे मात्र राहुल नार्वेकर म्हणतात हे पक्षांतर बंदी कायद्याचे नाही त्यामुळे कुणीच अपात्र नाही हा निर्णय पूर्णतः चुकीचा आहे.दिशाभूल करणारा आणि बेकायदेशीर आहे असे असीम सरोदे यांनी म्हटले आहे.