“मोदींनी दिलेले ‘ते’ आश्वासन अजून अपूर्णच!” भाजपा आमदाराने मोदींना रक्ताने लिहिले पत्र

नीरज झिम्बा यांनी या पत्रातून मोदींना भाजपाच्या जाहीरनाम्यात दिलेल्या एका अपूर्ण आश्वासनाची आठवण करून दिली आहे.“मी एका गंभीर विषयाकडे तुमचे लक्ष वेधण्यासाठी हे पत्र माझ्या रक्ताने लिहीत आहे” असे नीरज झिम्बा यांनी पत्रात म्हटले आहे.“गोरखा समुदायाच्या समस्यांवर कायमस्वरूपी राजकीय तोडगा काढण्याचे आणि गोरखा समुदायातील ११ मागास जातींना अनुसूचित जमातींचा दर्जा देण्याचे आश्वासन अद्याप अपूर्णच राहिले आहे” अशी आठवण त्यांनी पत्रात करून दिली आहे.दरम्यान गोरखा समुदायाच्या मागण्यांकडे दुर्लक्षच करण्यात आल्याची व्यथा त्यांनी पत्रात मांडली. “लडाखमधील लोक,काश्मिरी लोक,नागा,बोडो,मिझो यांना न्याय मिळत असताना गोरखा समुदायाकडे सातत्याने दुर्लक्षच केले जात आहे.केंद्र सरकारकडे या मुद्द्यावर तोडगा काढण्याची राजकीय इच्छाशक्तीच नसल्याचे हे द्योतक आहे त्यामुळे भारतीय गोरखा समुदायाला न्याय देण्याची वेळ आता आली आहे” असे नीरज झिम्बा यांनी पत्रात म्हटले आहे.

या पत्रासह नीरज झिम्बा यांनी त्यांची भूमिका पोस्टमध्ये मांडली आहे.“नरेंद्र मोदींनी २००९,२०१४ आणि २०१९ मध्ये ‘गोरखा का सपना,मेरा सपना’ असे म्हणत भाजपाच्या संकल्प पत्रातून दिलेले आश्वासन अद्याप अपूर्णच आहे.आमच्या मागण्या या फक्त याचिका नसून नेतृत्वावरील आमच्या अढळ विश्वासाचे प्रतीक आहे पण न्यायाला विलंब म्हणजे न्याय नाकारण्याचाच प्रकार असतो आणि आम्ही आता आमच्या मागण्यांच्या बाबतीत अधिक विलंब मान्य करू शकत नाही. माझी मोदींना विनंती आहे की त्यांनी आम्हाला फक्त न्याय दिल्याची घोषणा करू नये तर त्याची अंमलबजावणीही होईल यासाठी पुढाकार घ्यावा असे नीरज झिम्बा यांनी इन्स्टाग्रामवरील पोस्टमध्ये म्हटले आहे.दरम्यान त्यांच्या या पत्रावर खुद्द पंतप्रधान नरेंद्र मोदी वा केंद्र सरकारने नेमकी काय भूमिका घेतली ? हे अद्याप समोर येऊ शकलेले नाही.