“निवडणूक आयोगाला मतपत्रिकेवरच निवडणूक घ्यायला लावू ! “लोकशाही जिवंत ठेवण्यासाठी प्रहार सर्वात पुढे राहील”!! -बच्चू कडू यांनी पुन्हा एकदा भाजपाविरोधात ठोकला शड्डू

बच्चू कडू यांनी काही वेळापूर्वी प्रसारमाध्यमांशी बातचीत केली यावेळी ते म्हणाले,लोकसभेसाठी आम्ही महायुतीमध्ये आहोत की नाही ? हा संभ्रमित करणारा प्रश्न आहे.आम्ही लोकसभेची तयारी सुरू केली आहे.आम्हाला कुणी विचारले तर एकत्र येऊ नाही विचारले तर विरोधात लढू.आम्ही (प्रहार जनशक्ती पार्टीने) ‘मी खासदार’ अभियान राबविण्याची तयारी करत आहोत.एका मतदारसंघात २०० ते ३०० उमेदवार उभे करण्याची आमची तयारी आहे,लोकसभेसाठी सर्वाधिक उमेदवारांची यादी आम्ही जाहीर करू.जवळपास दोन ते तीन हजार उमेदवार जाहीर करण्याची तयारी आम्ही सुरू केली आहे.लोकांचे मतदान कुठे जाते ? हे समजून घेण्याचा आमचा प्रयत्न आहे.माझे मत कुठे जाते ? हे पाहण्यासाठी आम्ही शेकडो उमेदवार प्रत्येक मतदारसंघात उभे करू जेणेकरून सरकार आणि निवडणूक आयोगाला आगामी लोकसभा निवडणूक मतपत्रिकेवर घ्यावी लागेल असे झाले तर आम्ही आमच्या अभियानात जिंकलो असे समजू.”लोकशाही जिवंत ठेवण्यासाठी प्रहार सर्वात पुढे राहील” असे बच्चू कडू यांनी म्हटले आहे.

दरम्यान भाजपाबद्दल बच्चू कडू म्हणाले,आमच्यावर याआधी वेगवेगळ्या प्रकारची टीका झाली आहे परंतु आम्ही आमच्या मतदारसंघात काम करण्यावर लक्ष केंद्रीत केले.आमच्या मतदारसंघात रखडलेली कामे आम्ही केली याचे आम्हाला समाधान आहे.दुसरे महत्त्वाचे काम म्हणजे दिव्यांग मंत्रालय तयार झाले.सगळे बरे चालले आहे याचा अर्थ असा नाही की त्यांनी (भाजपा) आमचा सरकारमधील वाटा विसरावा.हे सरकार बनवताना आमचा सिंहाचा वाटा होता.आम्ही सरकारमध्ये सामील झालो नाही.मुळात हे सरकारच आम्ही बनवले आहे.भाजपा मात्र नंतर या सरकारमध्ये सामील झाली आहे हे भाजपावाल्यांनी लक्षात ठेवले पाहिजे असे बच्चू कडू यांनी नमूद केले आहे.