उमेदवारी माघार घेण्याच्या निर्णयाबाबत भूमिका स्पष्ट करतांना गायकवाड यांनी सोलापुरात आंबेडकरी जनता चळवळीसाठी संवेदनशील आहे मात्र पक्षाची कार्यकारिणी चळवळीसाठी पोषक नाही त्यात पोकळपणा आहे.काही अपवाद वगळता अनेक दलालांची घुसखोरी झाली आहे परिणामी त्यांना सोबत घेऊन आपण निवडणुकीची लढाई करू शकत नाही.दुसरी बाब म्हणजे आपल्या उमेदवारीमुळे भाजपविरोधी मतविभागणी होऊन त्याचा फायदा भाजपला होईल आणि भाजपच्या विजयाचे वाटेकरी आपण होऊ इच्छित नाही.भाजपचा डॉ.आंबेडकरांचे संविधान बदलण्याचा डाव आहे त्यासाठी त्या पक्षाचा खासदार निवडून पाठविण्यात आपला हातभार लागू नये म्हणून आपण उमेदवारी मागे घेतली आहे असे स्पष्टीकरण गायकवाड यांनी दिले आहे.२०१९ सालच्या सोलापूर लोकसभा निवडणुकीत वंचित बहुजन आघाडीचे नेते प्रकाश आंबेडकर यांनी एमआयएम पक्षाची मदत घेऊन उभे राहून एक लाख ७० हजार मते घेतली होती त्यावेळी काँग्रेसचे ज्येष्ठ नेते सुशीलकुमार शिंदे हे एक लाख ५८ हजार मतांनी पराभूत झाले होते.भाजपविरोधी मतविभागणीमुळे भाजपचे डॉ.जयसिध्देश्वर शिवाचार्य महास्वामी हे निवडून आले होते व त्याची पुनरावृत्ती पुन्हा यंदाच्या लोकसभा निवडणुकीत होणार की काय ? याबाबत प्रश्नार्थक चर्चा सुरू होती व त्यात एमआयएमने उमेदवार उभा न करण्याची भूमिका घेतली तर वंचित बहुजन आघाडीचे राहुल गायकवाड यांच्या उमेदवारीमुळे पुन्हा भाजपविरोधी किमान मतविभागणी होण्याची शक्यता वर्तविली जात असतांना अखेर राहुल गायकवाड यांनी माघार घेतली आहे त्यामुळे काँग्रेसच्या प्रणिती शिंदे यांना दिलासा मिळाल्याचे मानले जात असून भाजपविरोधी मतविभागणी टळणार असल्याची शक्यता निर्माण झाली आहे.