“भाकड जनता पक्षाचा नवा सिझन आलाय..” उद्धव ठाकरेंची भाजपा आणि मोदी शाह यांच्यावर जोरदार टीका

परभणी-पोलीस नायक (वृत्तसेवा) :-

दि.२४ एप्रिल २४ बुधवार

मी वादळात उभा राहणार आहे,संकटांना तोंड देणार आहे.येऊदे किती संकटे मी उभा ठाकलो आहे असे म्हणत उद्धव ठाकरे यांनी परभणीतल्या भाषणाला सुरुवात केली.उद्धव ठाकरे बोलत असतांना पाऊस आला व त्या पावसातही त्यांनी भाषण केले.महाविकास आघाडीचे परभणी लोकसभेचे उमेदवार संजय जाधव ह्यांच्या प्रचारार्थ उद्धव ठाकरेंनी सभा घेतली.त्या सभेत त्यांनी मोदी आणि शाह यांच्यावर जोरदार टीका केली.माझ्या शिवसेनेचा बालेकिल्ला म्हणजे ही परभणी आहे.माझ्यासमोर सगळे माझे मावळे बसले आहेत.मिंधे आणि भाजपा यांना वाटले असेल की पैशांनी सगळे घेता येते पण परभणीकर पैशांनी विकले जाऊ शकत नाहीत.आपली परीक्षा आहे.वादळला अंगावर घ्यायला मर्दाची छाती लागते ती आपल्याकडे आहे.पाठीवरुन आम्ही वार करत नाही असे उद्धव ठाकरे म्हणाले.आम्ही मातोश्रीवर भेट द्यायचो तेव्हा प्रसाद घेऊन जावा लागायचा मग तो काळा पैसा नव्हता का ? आपल्या गीतातून जय भवानी शब्द काढा हे सांगत आहेत.महाराष्ट्र मोदी आणि शाह यांना कान धरुन आणि जय भवानी जय शिवाजी म्हणत उठाबशा काढायला लावल्याशिवाय राहणार नाही.मोदी-शाह यांचा महाराष्ट्राबद्दल आकस आहे.उद्धव ठाकरेला संपवायचे आहे ना ? बघा प्रयत्न करुन पण महाराष्ट्राबद्दलचा राग असा काढता ? दिल्लीत बसलेत म्हणजे सगळा देश यांची मनमानी सहन करेल का ? प्रेमाने मिठी मारली तेव्हा आम्ही साथ दिली पण आता पाठीत वार केला आहात तर माझी वाघनखे बाहेर आली आहेत.आम्ही काही सुधीर मुनगंटीवारांसारखी वाघनखे आणण्याची शोबाजी करत नाही असेही उद्धव ठाकरे म्हणाले.

आपला महाराष्ट्र छत्रपती शिवरायांचा,साधू-संतांचा महाराष्ट्र आहे.सुधीर मुनगंटीवार यांनी त्यांच्या प्रचार सभेत बहिण भावाच्या नात्याबाबत बोलले ते सुसंस्कृत माणसाला खाली मान घालायला लावणारे आहे त्यांना मोदींनी आधी काही गोष्टी शिकवाव्यात.तुम्ही उद्धव ठाकरेची शिवसेना नकली आहे म्हणता.तुमच्या आजूबाजूला जे टिनपाट लोक आहेत ते वाट्टेल ते बोलत आहेत.सुप्रिया सुळेंना चॅनलसमोर शिवी दिली पण मोदी-शाह काही बोलत नाहीत.महिलांचा अपमान केलात तरीही चालेल पण मते द्या म्हणत आहेत अशा लोकांना एकही मत मिळता कामा नये असेही उद्धव ठाकरेंनी म्हटले आहे.मोदी-शाह आपल्या घराणेशाहीबद्दल बोलत आहेत.मला माझ्या घराण्याबाबत अभिमान आहे.आज मोदींचे नाणे महाराष्ट्रात चालत नाही,त्यांचा चेहरा चालत नाही त्यामुळे गद्दारांना बरोबर घेतले आहे जे हिंदूहृदयसम्राटांचा चेहरा दाखवून तुमच्याकडे मते मागत आहेत.मोदी जेव्हा घराणेशाहीवर बोलता तेव्हा आम्ही तुमच्या एकाधिकारशाहीवर बोलणारच.भाकड जनताचा नवा सिझन आलाय जुमला तीन.अॅक्टर तोच,खलनायक तोच,स्टोरी रायटर तोच.कितीवेळा तीच सीरिज बघायची ? महाराष्ट्र आणि देश यांनी नासवून टाकला.ही मालिका आता बंद करा.ही मालिका पाहून कुणाचे पोट भरलेले नाही.डोळ्यांदेखत महाराष्ट्र लुटत आहेत.जे महाराष्ट्राच्या हक्काचे आहे ते गुजरातला नेत आहेत तरीही आपण गप्प बसायचे ते होणार नाही.समोरच्याचे डिपॉझिट जप्त करुन आपल्याला जिंकायचे हे लक्षात ठेवा असेही उद्धव ठाकरे म्हणाले.