“हिंमत असेल तर माझ्या विरोधात निवडणूक लढवून दाखवा” ममता बॅनर्जींच्या पुतण्याचे अमित शाह यांना आव्हान

पश्चिम बंगाल-पोलीस नायक (वृत्तसेवा) :-

दि.१ मे २४ बुधवार

हिंमत असेल तर अमित शाहांनी माझ्या विरोधात निवडणूक लढवून दाखवावी,जर या निवडणुकीत माझा पराभव झाला तर मी सक्रीय राजकारणातून निवृत्ती घेईन असे आव्हान ममता बॅनर्जी यांचे पुतणे अभिषेक बॅनर्जी यांनी दिले आहे.पश्चिम बंगालमधील डायमंड हार्बर लोकसभा मतदारसंघातील एका प्रचार सभेत बोलतांना त्यांनी हे विधान केले आहे.यावेळी बोलतांना त्यांनी अमित शाह यांच्यावर जोरदार टीकाही केली आहे.जर भाजपाला वाटत असेल की मी सक्रीय राजकारणातून निवृत्त्व व्हावे तर भाजपापुढे तीन पर्याय आहे.पहिला पर्याय म्हणजे त्यांनी पश्चिम बंगालचे जीएसटीचे पैसे परत करावे,मी २४ तासांत राजकारणातून निवृत्ती घेईन,दुसरा पर्याय त्यांनी पंतप्रधान आवास योजनेचा थकीत निधी द्यावा,मी लगेच निवृत्ती घेईन आणि तिसरा पर्याय म्हणजे अमित शाह यांनी माझ्या विरोधात निवडणूक लढवावी व माझा जर पराभव झाला तर मी सक्रीय राजकारणातून निवृत्ती घेईल अशी प्रतिक्रिया अभिषेक बॅनर्जी यांनी दिली आहे.