“नकली शिवसेना, नकली राष्ट्रवादीने ‘रालोआ’त यावे!” पंतप्रधान मोदींच्या आवाहनाने सारेच संभ्रमात !!

मुंबई-पोलीस नायक (वृत्तसेवा) :-

दि.११ मे २४ शनिवार

नकली शिवसेना आणि नकली राष्ट्रवादीने ४ जूननंतर काँग्रेसमध्ये जाऊन मरण्यापेक्षा राष्ट्रीय लोकशाही आघाडीत सामील व्हावे या पंतप्रधान नरेंद्र मोदी यांच्या आवाहनामुळे भाजपसह सर्वच पक्ष संभ्रमात पडले आहेत.मोदींच्या वक्तव्याचे सर्वपक्षीय पडसाद उमटले असून शरद पवार, उद्धव ठाकरे यांच्यासह मुख्यमंत्री एकनाथ शिंदे,उपमुख्यमंत्री देवेंद्र फडणवीस यांनी त्यावर प्रतिक्रिया व्यक्त केल्या आहेत.नंदुरबार येथे भाजप उमेदवार डॉ.हीना गावित यांच्या प्रचारासाठी शुक्रवारी पंतप्रधान मोदी यांची जाहीर सभा झाली त्यावेळी त्यांनी,‘‘नकली शिवसेना आणि नकली राष्ट्रवादीने काँग्रेसमध्ये विलीन होण्यासाठी मनाची तयारी केली आहे पण ४ जूननंतर काँग्रेसमध्ये जाऊन मरण्यापेक्षा छाती फुगवून आमच्याकडे यावे’’ असे आवाहन केले.मोदी यांच्यासह गृहमंत्री अमित शहाही शिवसेनेच्या ठाकरे गटाचा उल्लेख वारंवार ‘नकली सेना’ असा करीत आहेत. तेलंगणातील एका सभेत तर मोदींनी उद्धव ठाकरेंचा उल्लेख बाळासाहेबांची ‘नकली संतान’ असा केला होता.पवार आणि ठाकरे यांनी ‘रालोआ’मध्ये सामील व्हावे या मोदींच्या नंदुरबारमधील प्रस्तावाचा समाचार घेताना राष्ट्रवादी काँग्रेस- शरदचंद्र पवार पक्षाचे अध्यक्ष शरद पवार यांनी,‘‘आम्ही नेहरू-गांधी यांची विचारसरणी मानणारे आहोत.नेहरू-गांधींची विचारधारा देशाला एकत्रित ठेवणारी आणि ऐक्याची आहे. त्याउलट पंतप्रधान नरेंद्र मोदींमुळे देशातील संसदीय लोकशाही संकटात आली आहे त्यामुळे त्यांच्याबरोबर जाण्याचा प्रश्नच येत नाही’’ तसेच पंतप्रधानपद हे घटनात्मक असल्याने त्या पदावरील व्यक्तीने जाहीर वक्तव्ये करतांना तारतम्य बाळगले पाहिजे.आक्षेपार्ह विधाने टाळली पाहिजेत असेही शरद पवार यांनी पंतप्रधान नरेंद्र मोदी यांना सुनावले आहे.