“मुलाने जर गाडी चालवायला मागितली तर त्याला गाडी दे आणि तू बाजूला बस”-चालकाचा महत्त्वाचा जबाब

पुणे-पोलीस नायक (वृत्तसेवा) :-

दि.२४ मे २४ शुक्रवार

पुण्यातील कल्याणीनगर भागात रविवारी १९ मे रोजी मध्यरात्री भरधाव मोटारीच्या धडकेत दुचाकीस्वार संगणक अभियंता तरुण,तरुणी मृत्यूमुखी पडले होते व या घटनेनंतर महाराष्ट्रासह देशभरात संतापाची लाट पसरली.ज्याप्रकारे अल्पवयीन आरोपीला १५ तासांत जामीन देण्यात आला त्यावरून पोलिसांवर टीका झाली.चहुबाजूंनी दबाव आल्यानंतर पोलिसांनी या प्रकरणात मोठी कारवाई करत अल्पवयीन आरोपीचे वडील विशाल अगरवाल व त्याला मद्य उपलब्ध करून देणारे पबमधील कर्मचारी यांच्यावर गुन्हा दाखल करण्यात आला तसेच अल्पवयीन आरोपीची रवानगी बालसुधारगृहात करण्यात आली.आता या प्रकरणात अगरवाल यांच्याकडे काम करणाऱ्या कर्मचाऱ्यांचेही जबाब समोर आले आहेत व त्या रात्री विशाल अगरवाल यांनी चालकाला कोणत्या सूचना दिल्या त्याची माहिती समोर आली आहे.पोलिसांनी अल्पवयीन मुलगा चालवत असलेल्या मोटाराच्या चालकाचा जबाब नोंदवला असून मुलाने जर गाडी चालवायला मागितली तर त्याला गाडी दे आणि तू बाजूला बस अशी सूचना अगरवाल यांनी दिली होती.गुन्हे शाखेचे पोलीस उपायुक्त अमोल झेंडे यांनी या प्रकरणाबाबत प्रतिक्रिया देतांना सांगितले की,अल्पवयीन आरोपीच्या आजोबांचा जबाब या प्रकरणात महत्त्वाचा आहे.ज्यामुळे अपघाताच्या रात्री काय झाले ? याचा उलगडा होतो.बारावीचा निकाल जाहीर झाल्यानंतर आपल्याला मित्रांबरोबर पार्टी करायची असल्याचे अल्पवयीन आरोपीने बुधवारी आपल्या कुटुंबियांना सांगितले होते.आजाबो सुरेंद्र अगरवाल यांनी आपला मुलगा विशाल अगरवालशी चर्चा केल्यानंतर नातवाला महागडच्या पोर्श कारची चावी दिली होती तसेच पार्टीच्या खर्चासाठी क्रेडिट कार्ड दिले होते.