निवडणुकीसाठी स्मार्ट चाल !! ‘प्रीपेड’ ऐवजी ‘पोस्टपेड’ विजेची देयके !! ‘स्मार्ट मीटर’ची सक्ती मात्र कायम !!

मुंबई-पोलीस नायक (वृत्तसेवा) :-

दि.२९ मे २४ बुधवार

आपल्या सुमारे एक कोटी ७१ लाख ग्राहकांना महावितरणकडून ‘प्रीपेड स्मार्ट मीटर’ची सक्ती करण्यास सुरुवात झाली असून याला असलेल्या तीव्र विरोधामुळे विधानसभा निवडणुकीच्या पार्श्वभूमीवर ‘प्रीपेड’ऐवजी ‘पोस्टपेड’ देयके असलेली मीटर बसविण्याचा महत्त्वपूर्ण निर्णय घेण्यात आल्याची माहिती उच्चपदस्थ अधिकाऱ्यांनी मंगळवारी दिली आहे.मात्र ‘स्मार्ट मीटर’ची सक्ती कायमच असून या प्रणालीची सवय झाल्यानंतर व निवडणुका पार पडल्यानंतर ग्राहकांना प्रीपेडकडे वळविले जाईल असेही सांगण्यात आले आहे.विदर्भात नागपूर,वर्धा भागात प्रीपेड स्मार्ट मीटर बसविण्यास सुरुवात झाल्यावर अनेक संस्था,संघटना व सर्वसामान्य नागरिकांनी तीव्र विरोध केला.काही ठिकाणी आंदोलनाची तयारी सुरू आहे.लोकसभेचे मतदान पार पडल्यावर लगेच सक्ती करण्यास सुरुवात झाल्याने नाराजीत भर पडली आहे.मात्र ऑक्टोबरमध्ये होऊ घातलेल्या विधानसभा निवडणुकीत याचा फटका बसण्याची सत्ताधाऱ्यांना भीती आहे त्यामुळे अनेक नेते व संबंधितांनी उपमुख्यमंत्री देवेंद्र फडणवीस यांना हस्तक्षेप करण्याची विनंती केली होती.सध्या केवळ स्मार्ट मीटर बसवून पोस्ट पेड बिलिंग पद्धतीच सुरू ठेवायची आणि ग्राहकांना सवय झाली की हळूहळू प्रीपेड प्रणालीत रूपांतरित करायचे असा तोडगा महावितरणने काढला आहे त्यामुळे स्मार्ट मीटरची सक्ती मात्र कायम असल्याचे स्पष्ट झाले आहे.स्मार्ट मीटरची ग्राहकांना गरजच नाही असे महाराष्ट्र वीज ग्राहक संघटनेचे अध्यक्ष प्रताप होगाडे यांनी म्हटले आहे.