चिन्ह गोठवल्यामुळे शिवसेना संपणार नाही तर उलट आणखी जोमाने उभी राहील

मुंबई-पोलीस नायक(वृत्तसेवा):-  शिवसेना हे नाव आणि निवडणूक चिन्ह धनुष्यबाण या दोन्हीवर दोन्ही गटांनी दावे केल्यानंतर शनिवारी सायंकाळी मुख्य निवडणूक आयुक्त राजीवकुमार यांच्या अध्यक्षतेखाली निवडणूक आयोगातील वरिष्ठ अधिकाऱ्यांची बैठक झाली.चार तासांपेक्षा अधिक वेळ चाललेल्या या बैठकीअंती शिवसेना हे नाव आणि निवडणूक चिन्ह धनुष्यबाण हे दोन्ही गोठवण्याचा निर्णय जाहीर करण्यात आला आहे.निवडणूक आयोगाचा हा निर्णय शिवसेना पक्षप्रमुख उद्धव ठाकरे यांच्यासाठी मोठा धक्का मानला जात आहे.या पार्श्वभूमीवर ठाकरे यांच्या राजकीय भवितव्याविषयी प्रश्नचिन्ह उपस्थित केले जात असतानाच राष्ट्रवादी काँग्रेसचे अध्यक्ष शरद पवार यांनी या सर्व घडामोडींबाबत आपली पहिली प्रतिक्रिया दिली आहे.चिन्ह गोठवल्यामुळे शिवसेना संपणार नाही उलट तिथली तरुण पिढी आणखी जोमाने उभी राहील आणि आपली शक्ती वाढवेल असा विश्वास शरद पवार यांनी व्यक्त केला आहे.तसेच निवडणूक आयोगाच्या या निर्णयाचा महाविकास आघाडीवर काय परिणाम होईल या पत्रकारांनी विचारलेल्या प्रश्नावरही पवार यांनी उत्तर दिले.ते म्हणाले की महाविकास आघाडीत काँग्रेस,राष्ट्रवादी आणि शिवसेना ठाकरे गट आहे या निर्णयाचा महाविकास आघाडीवर कोणताही परिणाम होणार नाही असे पवार यांनी स्पष्ट केले आहे.

दरम्यान आगामी काळात ठाकरे आणि शिंदे गटाने निवडणुकीला सामोरे जाण्याची तयारी ठेवावी असा सल्लाही शरद पवार यांनी दिला आहे.शिवसेनेचे धनुष्यबाण हे निवडणूक चिन्ह गोठवण्यात आल्यानंतर राष्ट्रवादीचे आमदार रोहित पवार यांनी भाजप आणि शिंदे गटावर जोरदार निशाणा साधला आहे.शिवसेना हे नाव आणि धनुष्यबाण हे चिन्ह गोठवण्याचा निवडणूक आयोगाचा निकाल लोकांसाठी धक्कादायक असला तरी अनपेक्षित मात्र नक्कीच नाही.चिन्ह गोठवले म्हणजे आपले मनसुबे साध्य होतील असा त्रयस्थांचा अंदाज असला तरी लोकांच्या मनातली निष्ठा मात्र गोठवता येणार नाही.दसरा मेळाव्यात दिसलेली निष्ठा निवडणुकांमध्येही निश्चित दिसेल.धनुष्यबाणाचे चिन्ह आणि शिवसेना हे नाव गोठवल्याने खऱ्या शिवसैनिकाला अत्यंत वेदना होत असणार हे मात्र खरे आहे.पण ज्यांना त्रास होत नसेल त्यांनी दुसऱ्यांची स्क्रिप्ट स्वीकारली असेच म्हणावे लागेल असे ट्वीट रोहित पवार यांनी केले आहे.