महायुतीला धक्का देत ‘एकला चलोरे’चा नारा !! महादेव जानकर २८८ मतदारसंघात उमेदवार उभे करण्याच्या तयारीत !!

अकोला-पोलीस नायक (वृत्तसेवा) ;-

दि.३० ऑगस्ट २४ शुक्रवार

आगामी विधानसभा निवडणुकीच्या पार्श्वभूमीवर राष्ट्रीय समाज पक्षाकडून राज्यातील २८८ मतदारसंघात तयारी चालवली असून इतर पक्षांच्या खोट्या आश्वासनांना बळी पडू नका.आपले १० आमदार निवडून आले तरी पक्षाचा मुख्यमंत्री होऊ शकतो असे वक्तव्य राष्ट्रीय समाज पक्षाचे अध्यक्ष महादेव जानकर यांनी केले आहे.अकोला येथे पक्षाच्या वर्धापनदिनानिमित्त आयोजित मेळाव्यात ते बोलत होते.महादेव जानकर यांनी ‘एकला चलोरे’ची भूमिका घेतल्याने महायुतीतून आणखी एक पक्ष दुरावण्याची चिन्हे निर्माण झाली आहेत.महायुतीच्या अडचणीत दिवसेंदिवस वाढ होत असल्याचे चित्र आहे.राष्ट्रीय समाज पक्ष महायुतीचा घटक आहे मात्र प्रत्येक पक्षाला आपला जनाधार वाढला पाहिजे अशी अपेक्षा असते.विविध पक्षांचे दलाल येतील त्यांच्यापासून सावध राहण्याची गरज आहे.महायुती किंवा महाविकास आघाडी असा विचार आता करू नका.रासप देखील एक दिवस राज्य करणार आहे.कार्यकर्त्यांनी आतापासून कामाला लागावे व आपली राज्यात ताकद किती आहे हे बघायचे आहे.राज्यात पक्षाची रेष वाढवायची आहे त्यामुळे २८८ जागांवर तयारी करण्याचे काम सुरू झाले.प्रत्येक मतदारसंघात संघटन वाढविण्याच्या दृष्टीने प्रयत्न सुरू आहेत असे महादेव जानकर यांनी सांगितले.