राज्यातील होमगार्ड्ससाठी खूशखबर !! मानधनात दुप्पट वाढ !! आता मिळणार देशातील सर्वाधिक मानधन !! देवेंद्र फडणवीसांची घोषणा

मुंबई-पोलीस नायक (वृत्तसेवा) :-

दि.१२ ऑक्टोबर २४ शनिवार

पोलिसांच्या बरोबरीने राज्यात कायदा व सुव्यवस्था राखण्यासाठी होमगार्ड्स महत्त्वाची भूमिका बजावत असतात पण गेल्या काही काळापासून होमगार्ड्सचे मानधन वाढविण्यासंदर्भात वारंवार मागणी केली जात होती.आज अखेर दसऱ्याच्या मुहूर्तावर गृहमंत्री देवेंद्र फडणवीस यांनी ही मागणी मान्य केली असून मानधनात दुप्पट वाढ केली आहे.देवेंद्र फडणवीस यांनी एक्सवर पोस्ट करून ही माहिती दिली आहे ते म्हणाले, राज्यातील होमगार्ड्सचे मानधन जवळजवळ दुप्पट करण्यासंबंधीचा शासन आदेश जारी करण्यात आला आहे.प्रतिदिन ५७० रुपयांवरून ते आता १०८३ रुपये इतके करण्यात आले आहे व आता हे मानधन देशात सर्वाधिक आहे.देवेंद्र फडणवीस पुढे म्हणाले,याशिवाय विविध भत्त्यांची रक्कम सुद्धा दुप्पट करण्यात आली आहे.उपहार भत्ता १०० वरून २०० रुपये तर भोजन भत्ता १०० वरून २५० रुपये इतका करण्यात आला आहे.राज्यातील सुमारे ५५,००० होमगार्डना या निर्णयाचा लाभ मिळेल.१ ऑक्टोबर २०२४ पासून ही वाढ देण्यात येईल.गेल्याच महिन्यात सुमारे ११,२०७ होमगार्ड्सची भरती प्रक्रिया सुद्धा पूर्ण करण्यात आली आहे.सध्या त्यांचे प्रशिक्षण करण्यात येते आहे.सर्वांना विजयादशमीच्या हार्दिक शुभेच्छा!